Sinode kry sy eie lied

U nooi ons in, ʼn lied wat die Esegiël 47-tema vasvang, is spesiaal vir die Buitengewone Algemene Sinode 2016 geskryf.

Só vertel ds Faani Engelbrecht, sangleier van dié Sinode se band en bestuurder van Bybel-Media Musiek.

Hy sê dr Nico Simpson, hoof van publikasies by Bybel-Media, het die woorde geskryf en dr Siegfried Louw, van die NG gemeente Proteahoogte, het gesorg vir die melodie.

U nooi ons in is geskryf vir voorsang tydens die sinode, maar die bladmusiek gaan ook na afloop van die sinode gratis beskikbaar gestel word aan gemeentes, sê Engelbrecht. Hy sê die multitrack (backtrack) van dié lied sal ook later by Bybel-Media beskikbaar wees.

ʼn Video van die lied is vanoggend op YouTube gelaai. Op die video word gewys hoe Simpson die grafika, wat spesiaal vir die sinode geskep is, teken.

Volgens Faani is die musiek van die video eers die Saterdagaand voor die sinode klaar opgeneem.

Volg hierdie skakel om die video te kyk.