Help só na Knysnaramp

“Verstommend!”

Só beskryf ds Pieter van Santen van die NG gemeente George-Tuinedal die “ongelooflike samewerking van die gemeenskap oor kerkgrense heen” nadat die onlangse Knysna-brand sowat 439 huise verwoes het.

Volgens Van Santen, voorsitter van die Ring van George, het Knysna al soveel noodvoorrade ontvang dat hul stoorruimte nou ʼn versadigingspunt bereik het. Daarom wil hulle diegene wat nog wil bydra vriendelik versoek om eerder ʼn finansiële bydrae te maak aan die NG Kerk in SA se rampfonds (sien onder).

Maar indien iemand steeds noodvoorrade wil stuur moet hulle dit eerder direk na George stuur waar dit gesorteer en gekanaliseer sal word, sê Van Santen.

“Hier is soveel mense wat wil help. Van mense wat help sorteer tot die boere in die gemeenskap. Hulle het hulle pak- en koelstore beskikbaar gestel waar ons voorrade ook sal berg,” sê hy.

Van Santen se gebedsversoek is dat daar vir logistieke hantering van noodvoorrade en goeie reën gebid sal word omdat verskeie gebiede nog na die brand smeul.