Gereformeerde jeug kom byeen in Leipzig

Leipzig. – “90 miljoen mense – dit is jóú kerk-familie …”

Dit was die woorde van Chris Ferguson, die algemene sekretaris van die Wêreldgemeenskap van Gereformeerde Kerke, aan sowat honderd gereformeerde jongmense by ʼn jeugbyeenkoms voor die Wêreldgemeenskap se 26ste Algemene Vergadering  van 29 Junie tot 7 Julie in Leipzig.

Die doel van die byeenkoms was vir jongmense van regoor die wêreld om na te dink oor die tema “Lewende God, hernuwe en verander ons”. Dit is ook die tema van die Algemene Vergadering. Dié jongmense, tussen die ouderdom van 18 en 30, is spesifiek afgevaardig om sodoende jonger mense in die samelewing se stemme te laat hoor.

Die afgevaardigdes het temas van geregtigheid vir die aarde, sosiale transformasie en ander plaaslike sowel as globale uitdagings aangepak deur gesprekke te voer, musiek saam te maak, te dans en poësie te skryf.

Daar is ook sterk klem gelê daarop om ekumeniese bande te versterk op die mees organiese vlak, naamlik vriendskappe wat oor kulturele grense strek.

Raissa Brasil, van die Verenigde Presbiteriaanse Kerk van Brasilië, het gesê dat die jongmense van haar kerk wíl betrokke raak in die samelewing en in hulle gemeente. Sy sê dat dit vir haar baie beteken het om die uitdagings van haar eie gemeenskap te kan deel met ander jongmense wat haar dan help om nuwe insigte te kry.

Febrima Yuliana Moulaka van Indonesië, is ook oortuig dat die jeug ʼn baie positiewe bydrae sal lewer in die jaar se vergadering.

Vir Jolanda Boelens van die Verenigde Protestantse Kerk in België, was dit ʼn besonderse ervaring om saam met ʼn klomp verskillende kulture te bid, al verstaan sy nie almal se tale nie.