Dit gaan oor brûe, nie mure nie

Die moderatuur van Wes-Kaapland het onlangs ’n groep jong predikante op ’n geskiedkundige reis geneem sodat hulle saam kon droom “van­uit hul historiese wortels” oor die toekoms.

Die reis het begin by die Groote Kerk in Kaapstad, waaruit meer as ’n 1 000 gemeentes oor die jare ont­staan het.

Later het die groep van 29 predikante saam met die moderatuur vanaf die Nelson Mandela Gateway-museum na Robbeneiland vertrek, vertel ds Charl Stan­der, skriba van die sinode.

Op die eiland het twee begeleide toere, ernstige ge­sprekke en nadenke gevolg waarna hulle in die tronk oor­nag het.

“Om stories te hoor wat ons eie stories uitdaag, verruim en verryk, was absoluut transformerend. Nuwe insigte is gedeel en ’n blik op die pyn van die verlede het ons erg ontwrig. Maar dit het ons gehelp om wortel te skiet in ons geskiedenis en ons uitgedaag om as kinders van Afrika ons identiteit helder uit te klaar en ons roeping in hierdie land beter te artikuleer,” sê Stander.

Een van die jonger predikante was diep geraak deur die toergids, Itumeleng Makwela, wat self sewe jaar lank ’n politieke gevangene op die eiland was.

“Itumeleng se broosheid en intense seer het ’n bewustheid by my gekweek dat daar genesing lê in tyd, ja, tyd leer en tyd gee perspektief. Nou sit ek in die Karoo terwyl die windpomp saggies in die agtergrond lê en fluister. Gebombardeer met frustrasies van die verlede, maar tog vasgevang in die hoop wat net God bied,” sê ds Fritz Kotze van Fraserburg.

Ds Nelis Janse van Rensburg, voorsitter van die sinode, sê die metafoor van Robbeneiland is “dik mure van skeiding”. Maar dié jong predikante weet húl roeping het te doen met brûe, nie mure nie, sê hy.

“Ons het nou nuwe verbeelding nodig vir die inbreek van die koninkryk in ons tyd. Ons jong dominees is gereed daarvoor – nie oorversekerd met al die antwoorde nie, maar gereed om brûe te bou, gereed om te dien, gereed om te lei.”