Homo sapiens het korrupte verhouding met Skepping

Tiaan Boshoff van Grootbrakrivier skryf:

Vuurstorms het in Knysna plaasgevind, soortgelyke brande met groot lewensverlies in Australië, Portugal, Amerika en in Rusland. Waarom?

Pool-ys smelt en miljoene ton metaangas wat in die ys vasgevang was, word in die atmosfeer losgelaat, baie meer as wat die totale mensdom met sy grypsug tot dusver in sy bestaan kon vervaardig. Waarom?

Kan ons as denkende gelowiges nie maar die gewaande strydbyl tussen wetenskaplikes en Christene begrawe nie? Vir ons voortbestaan op planeet aarde het ons mekaar onsettend nodig. Ons rigtingaanwyser, die Bybel, maak dit baie duidelik dat net jou verhouding met God, met jou medemens, asook jou verhouding met Sy skepping belangrik is. Kerke en geloofsgemeenskappe spandeer 99% van hul aktiwiteite aan eersgenoemde twee verhoudings.

Die Groot Gebod noem nie net dié twee nie. Gaan lees weer, die teks eindig met: “soos jouself”. Kan jy jou naaste liefhê as jy jouself, jou totale menswees, ingesluit jou volhoubare harmonieuse voortbestaan in en met die skepping, nie liefhet nie?

Kyk na die heel eerste opdrag. Genesis 1:28 gaan duidelik oor ons verhouding met die skepping. As hierdie verhouding misluk, kan daar geen volhoubare verhouding met jou medemens wees nie. Wat doen ons in ons alledaagse lewe, asook in ons geestelike gemeenskappe om die oorsaak vir die stelselmatige vernietiging van die Skepping te identifiseer en te probeer omkeer? Bid? Dit spreek vanself. Lig ons onsself uit ons warm gebroeide kerkbanke om beskikbaar te wees as instrumente in Sy hande? Wat doen ons om die oorsaak van alle soorte besoedeling, water en voedsel tekorte, aardverwarming, werkloosheid, renosterstropery, plaasaanvalle, roofmynbou, vandalisme, en dies meer te identifiseer?

Natuurlik is daar baie mense wat daagliks uitstekende werk doen vir die oplossing van elk van dié afsonderlike probleme. Ongelukkig word elke probleem op sy eie hanteer.

Staan ons egter terug en sien bogemelde probleme as ’n geheel, spring Genesis 1:28 na vore, ’n gelowiges se heel eerste opdrag. “Vul die aarde en heers” (bestuur). Ons het tot dusver net die aarde gevul, tot oorlopens toe gevul. Van bestuur (heers) het niks gekom nie.

Tyd vir die versuikerde leuens (politieke korrektheid) is vinnig aan die verbygaan. Ons, wêredwyd, is bloot te veel mense vir planeet aarde. Elk van bogenoemde probleme is aanmekaar verweef. Ons getalle neem eksponensieël toe, daarmee ook elk van genoemde probleme. ’n Simplistiese voorbeeld: minder mense sou ’n mindere koolstofvoetspoor hê, aardverwarming sou ’n kleiner effek hê, brande sou beheer kon word, pool-ys sou nie smelt nie, metaangas sou in die ys vasgevang gebly het.

Het dit nie tyd geword dat Christene en Christenwetenskapikes wêrelwyd help om die probleem van oorbevolking op kerklike en regeringsforums te pak nie? Noudat ons wêreldwye verteenwoordiging op kerklike forums het, kan ons asseblief wegkom van die versuikerde leuen?

Vriend, sien in jou geestesoog ’n driebeenpotjie op ’n kampvuur, waarvan twee pote 99% langer as die derde een is. So ’n pot kan nie staan nie, dit het omgeval, jou kos lê in die as, oneetbaar, jy gaan honger ly, tensy …