Geld vir KB-Kersfonds, vra intekenaar met 100ste verjaarsdag

Kerkbode se oudste intekenaar het onlangs met die viering van haar 100ste verjaardag ’n spe­sia­le versoek aan haar gaste gerig. Vergeet van geskenke, skenk eerder geld vir die Kerkbode se Kersfonds, was haar versoek.

Dirkie Fourie, ’n inwoner van Ametis-aftreeoord in die Strand, het voor haar verjaarsdag besluit sy het tog nie geskenke vir haarself nodig nie. Die geld moet vir kinders in tehuise gaan, was haar wens.

Nadat haar familie besluit het om vir haar twee partytjies te hou met dié groot dag – een vir die inwoners van haar aftreeoord en een vir familie – is haar versoek met uitnodigings aan die gaste oorgedra, het haar seun, dr Pieter Fourie, verduidelik.

Dirkie Fourie tydens haar 100ste verjaarsdag. Foto: Sulet Fourie

Die inwoners van die aftreeoord is op 10 Junie deur die Kaapse mezzo-sopraan, Minette du Toit-Pearce, bederf.

Op haar verjaarsdag, 11 Junie, het haar kinders, klein­kinders en agterkleinkinders saam met haar fees gevier by die Erinvale-landgoed in Somerset-Wes. By albei geleenthede het gaste graag hulle beursies vir dié goeie doel oopgemaak.

R4 200 is uiteindelik aan Kerkbode se Kersfonds oor­betaal. Sy en Pieter het saam besluit Kerkbode se Kersfonds is die beste voertuig aangesien dié fonds ’n jarelange instelling is wat hul opbrengs onder sowat 32 kinderhuise verdeel.

Waarom lees “tannie Dirkie” steeds die Kerkbode? “Daar is dan gereeld die wonderlikste verhale in oor die verskil wat Christen- en kerkmense in die lewe van hulle gemeenskappe maak,” sê sy.

“Die lewe skuld niemand van ons iets nie. Maar dit is wonderlik as ons terug ontvang nadat ons maar net gehoorsaam aan die Here ons medemens gedien het,” is haar raad aan ander.

“En verder glo ek dit is ons as Christene se verantwoordelikheid om te sorg dat geestelike lektuur kan voortbestaan deur daarop in te teken, soos in die geval van Kerkbode en LiG-tydskrif.”