Gelowig en groen

Die bekende teoloog Jürgen Moltmann vertel dat die aar­de ’n buurplaneet in die ruimte raakloop. “Jy lyk darem gehawend, wat’s fout?” verneem die planeet besorg. “Ek ly aan homo sapiens,” antwoord Aarde. “Toemaar,” word sy getroos, “ek het dit ook gehad, maar ’n rukkie gele­de heeltemal afgeskud!” Hiermee verwys Moltmann na die problematiese verhouding tussen die natuur en kul­tuur.

Anton Chekhov meen die mens is toegerus met die nodige intellek en kreatiwiteit om dit wat in die skepping aan ons nagelaat is, te koester en te vermeerder, maar “up to now he has not created, he has destroyed”. ’n Kombuismes kan inderdaad nuttig aangewend word, of groot verwoesting aanrig – die verskil lê by die hanteerder.

Dit laat mens nadink oor hóé ons kultuur bedryf. Dawie Klopper vermeld dat die VSA se grootste energiebron deesdae sonpanele is – oorskakeling na hernubare ener­gie dus, wat ’n kleiner koolstofvoetspoor op die aarde laat.