Waar en wanneer is kerk?

Ek het twee jaar lank die voorreg gehad om in die ingenieurswêreld te werk, waar jy met ’n wye spektrum van mense te doen kry. Mede-gelowiges, eks-moslems, nie-gelowiges, Afrikaanse, Engelse, Setswana-, Sesotho-, Zoeloe-mense, en selfs ’n buitelander – almal mense soos ek en jy.

Ek het die kerk in die wêreld beleef. Beleef hoe ’n lawaaierige staalfabriek ook ’n gemeente van die Here kan wees. Hoe ’n “makwerekwere”, soos die boorlinge van Suid-Afrika buitelanders noem, ’n eks-moslem, sy geloofsreis met my kon deel. Vir my kon vra om vir hom en saam met hom te bid. En wanneer ek gefrons het, het hy my nader geroep om te hoor wat fout is en of hy vir my kan bid.

Kerk-en-wêreld het een geword! ’n Pa kon sy kommer oor sy kinders uitspreek en by sy dominee-kollega raad vra. Saam kon ons trane afvee oor die afsterwe van ons Setswana-vrag­motorbestuurder. Ons het saam kwaad geword oor Bushi en Clinton se motors wat gesteel is. Soos ’n gemeenskap van ge­lowiges het ons saam met oom Lukas bekommerd op sy kan­ker­uitslae gewag. En was ons saam met hom bly toe sy tel­lings gedaal het.

Paulus skryf in Romeine 12 dat ons nie aan die sondige wêreld gelyk moet word nie. Met die klem op die sondige. Ons bly egter in hierdie stukkende, dog mooi wêreld.

Dikwels maak ons ’n direkte koppeling tussen die “sondig” en die “wêreld” en raak ons bang vir die wêreld. Bang om met mense “kerk” te praat, terwyl ons maklik oor stokperdjies en belangstellings praat.

Wanneer jy egter met mense jou geloofsreis deel, word dit soos die stokperdjies en belangstellings: Mense praat skielik saam: deel hulle vrae, hulle blyd­skap, hulle hartseer en bekommernisse.

In Matteus 28 gee die Here Jesus die opdrag: “Gaan na al die nasies toe, en maak hulle my dissipels.” Ons moet hulle leer, die goeie nuus met hulle deel.

Die wonder van in-die-wêreld wees, is dat die nasies nie meer daar ver is nie. Hulle is in die kantoor of werkswinkel langs jou. Die Here het die nasies na ons toe gebring. Ons het die voorreg om die evangelie met hulle te deel – sommer hier om ons waar die Here ons geplant het. Of dit in ’n raserige fabriek is, ’n kantoor of op die stowwerige landerye – orals het ons die voorreg om die opdrag van die Here uit te leef.

En skielik is werk ook kerk.

Ds Jan Nel is verbonde aan die NG gemeente Tetelestai in Randfontein.