Hier is die Andrew Murray-prysfonds se wenners

Die 2018-wenners van die pryse en toekennings van die Andrew Murray-prysfonds, is pas aangekondig. 

  • Die Andrew Murrayprys vir ʼn algemeen-Christelike publikasie in Afrikaans is gewen deur André Pretorius vir sy boek, Geloof alleen, uitgegee deur Naledi. Die beoordelaars beskou dié werk as ʼn “totale verrassing”. Deur die Kerkhervorming van 500 jaar gelede uit die hoek van reisverhale te beskou, gebruik die skrywer ’n kreatiewe aanpak wat ’n rits ryk perspektiewe op dié sleutelera in die kerkgeskiedenis ontsluit. Waar die Hervorming dikwels bloot uit die hoek van kerkleer bespreek word, is hier ’n wye kyk wat uiteindelik vra hoe dit die lewe van mense, van gemeenskappe en van generasies raak. Hoewel dit oor ernstige stof gaan, het die boek ’n ligte aanslag. “Dis lekker om saam met André en klein Daniel (sy seuntjie) te reis,” meen die beoordelaars. Hulle is Neels Jackson, redakteur van die Kerkbode, prof Jan-Albert van den Berg van die Vrystaatse Universiteit, en dr Ernst van der Walt, emeritus-predikant. Pretorius is ’n prokureur wat in Londen werk.
  • Die Andrew Murray-Desmond Tutu-prys vir Christelike en vakwetenskaplike teologiese publikasies in ’n amptelike taal van Suid-Afrika, is gewen deur Louis Jonker vir sy boek, Defining All-Israel in Chronicles, uitgegee deur Mohr Siebeck. Die beoordelaars wys daarop dat Jonker “die hermeneutiese lens van identiteit” toepas in die interpretering van die Bybelboek Kronieke. Hy ondersoek op voortreflike wyse die voordele en beperkings van verskillende sosiologiese modelle. “Dit is ’n werk van puik akademiese navorsing van die hoogste kwaliteit,” skryf die beoordelaars. Hulle is prof Mary-Ann Plaatjies-Van Huffel van die Universiteit Stellenbosch en drr Lodewyk Sutton en Tanya van Wyk van die Universiteit van Pretoria. Prof Jonker is verbonde aan die Universiteit Stellenbosch.
  • Die Desmond Tutu-Gerrit Brandprys vir debuutwerk in ’n amptelike taal van Suid-Afrika, is gewen deur Pierre du Plessis vir sy boek, Jesus ruik na mirre en stof, uitgegee deur Lux Verbi. Die beoordelaars skryf dat hierdie boek besonders is omdat dit nadruk lê op die menslikheid van Jesus wat dikwels onderbeklemtoon word ter wille van sy Goddelikheid. “Kortom: eerlike, maar verwonderde gesels in vars Afrikaans oor ’n saak wat duidelik na aan die hart en emosie van die skrywer lê. Die verrassende invalshoek van Du Plessis is sowel intellektueel stimulerend as geestelik verrykend.” Die beoordelaars is dr Hetta van Niekerk, opvoedkundige sielkundige van George, en prof Johan Cilliers van die Universiteit Stellenbosch.
  • Twee toekennings word ook gemaak. Die Andrew Murray-FAK-toekenning vir Christelike Musiek gaan aan Pieter H van der Westhuizen vir sy groot bydrae tot veral die Afrikaanse koormusiek, en ’n Spesiale Andrew Murray-toekenning word gegee aan Timo Crouse vir sy rol in die verspreiding van die Bybel, die bevordering van die Christelike boek en sy aktiewe betrokkenheid by die Andrew Murray-prysfonds sedert die stigting daarvan 40 jaar gelede.

Die pryse en toekennings word op 25 Mei by Neethlingshof in Stellenbosch oorhandig.