Sepedi lééf in Universiteitsoord

Jy kan nou by ’n gemeente in Pretoria gaan aanklop vir klasse in Sepedi (Noord-Sotho).

So vertel Louise Janse van Rensburg, wat aan die hoof van dié projek by NG gemeente Universiteitsoord staan, oor koffie.

“Kom ons bid in Sepedi,” nooi Louise, ’n lidmaat wat nou Sepedi lééf, oor mid­dagete.

Ds Jana de Lange, leraar van die gemeente, het die bal aan die rol gesit. Om ’n swart taal aan te leer was op haar doen-lysie. Toe sy agterkom dat Louise Sepedi praat, het sy dadelik haar medeleraars, dr Arno Meiring en ds Frits Snyman, gena­der. Die drie het besluit dat Sepedi-klasse onder leiding van Louise ’n projek van Universiteitsoord moes word. “Hierdie projek van die gemeente is ’n uitreikaksie wat ons bemagtig om kultuurgrense oor te steek,” sê ds Meiring.

En nou lééf Sepedi by Universiteitsoord ook.

Louise sê: “Die spreekwoord wat eensklaps by my opkom wanneer ek aan Sepedi dink, is die een wat sê ‘Motho ke motho ka batho’. Ons is ’n mens met mense. Die Engelse vertaal dit so mooi met: ‘I am because you are’.”

Die Sepedi-klasse word Thutišano genoem. Dit beteken “om mekaar te laat leer”.

“Ons moet die taal sáám oefen,” sê Louise met haar kenmerkende passie vir die taal.

Louise verwys ook na pres Nelson Mandela se bekende aanhaling: “Praat met iemand in ’n taal wat hy verstaan, en jy spreek tot sy verstand; praat met iemand in sy eie taal en jy spreek tot sy hart.”

Die Sepedi-klasse vind nou vir ’n tweede keer die jaar plaas met altesaam 25 leerders. Louise vertel hoe ’n wonderlike ervaring dit was toe daar bykans 30 mense, meestal studente, by die eerste klas opgedaag het.

Alhoewel ons nie vlot Sepedi kan praat na sewe weke nie, is daar baie getuienisse oor die positiewe gesindhede buite die klas wat net die groet of ’n paar woorde in Sepedi gekweek het.

Thutišano is ’n inleidende kursus wat die volgende insluit:
Aanvangsgroet en afskeidsgroet; Aanvangsgesprek: Persoonlike inligting (naam, van, blyplek, ensovoorts); Werkwoorde met die oog op bevele en of versoeke en Basiese sinsformulering.

Louise vertel tong in die kies hoe die leerders goedig vir mekaar lag as hulle probeer om Sepedi soos ’n ware Sotho te praat. Met uitspraak en al. “Maar dit maak nie saak hoe dit klink nie, solank ons aanhou om Sepedi te praat!”

Vir verdere inligting oor die Thutišano-projek, skakel Louise Janse van Rensburg by 082 787 4763.