“Kerk moet meer headlines maak met sy naasteliefde”

“Jesus se lewe was baie omstrede. Ek wens die kerk kan bietjie meer omstrede wees met sy liefde vir mense.”

Só het akteur en musikant Bouwer Bosch onlangs tydens ʼn optrede by die Durbanville Moedergemeente gesê.

Hy en kunstenaars Almero Welgemoed en Danie du Toit, oftewel Reënwolf, het op 20 Januarie daar opgetree.

Bouwer glo dat die kerk omstredenheid by kunstenaars kan leer. “Almal ken die storie van die sondige vrou wat Jesus se voete gewas het. Die storie is ’n voorbeeld van hoe brutally intens Jesus se liefde vir stukkende mense was. Ek dink die kerk moet meer headlines maak vir die manier waarop hulle liefhet,” het hy gesê.

Hy meen ook: “Kunstenaars kan spesifiek help om op hierdie manier te disrupt. Net soos kunstenaars gemeenskappe en denke disrupt moet die kerk ook denke vir die regte redes disrupt.”

https://www.youtube.com/watch?v=gzgdmdh8F38

Ds Wynand Breytenbach, predikant by Durbanville gemeente, sê die “Kerk en Kreatiwiteit”-geleentheid het ontstaan om die verhouding tussen die kunste en die NG Kerk te probeer bevorder. “Die kunstenaars het uit die NG Kerk gevlug en ons probeer ’n plek skep waar die kruis en kuns weer kan ontmoet.” Almero vertel dat hy al baie mense in die kerk teëgekom het wat voel daar is nie plek vir kunstenaars in die kerk nie. Hy sê egter dat die kerk eintlik uit kunstenaars bestaan. “Wanneer ’n predikant ’n preek maak is hy of sy kreatief. Dis ’n vorm van kuns om tekste te neem en dit met praktiese leefwyses te verbind.”