Kerswaak vir moskee-moord

Christene het Sondagaand (17 Maart) vir ’n kerswaak op St George-katedraal in Kaapstad se trappe in solidariteit met hulle “Moslembroers en -susters” byeengekom.

“Dit was ’n heilige oomblik, ’n oomblik van lig teenoor duisternis en ’n oomblik van eenheid teenoor verdeeldheid. ’n Oomblik van liefde teenoor haat,” sê ds Riaan de Villiers, leraar van die Groote Kerk in Kaapstad.

Die “duisternis” was die massamoord van sowat 50 Moslems wat volgens Netwerk24 deur die 28-jarige Brenton Tarrant van Australië op 15 Maart gepleeg is. Tarrant het sy moordtog op twee moskees in Christchurch, Nieu-Seeland, regstreeks op Facebook uitgesaai.

Die Groote Kerk het lidmate op Facebook in kennis gestel dat hulle, in plaas van hulle gewone aanddiens by hul kerkgebou, by St George-katedraal vir ’n kerswaak moet aansluit.

Volgens De Villiers het die Groote Kerk-lidmate saam met ’n diverse groep mense op die trappe kerse gebrand en in stilte gebid vir die slagoffers.

De Villiers sê om Jesus te volg “lei jou tot langs mense wat vervolg word, wat gemarginaliseer, verwerp en gehaat word”.

“In Christchurch is kinders van God met onbeskryflike geweld om die lewe gebring terwyl hulle besig was om te bid. Jesus treur hieroor en sy kerk behoort hierdie mense te omarm en saam te treur.

Jacques Strydom, ’n lidmaat van die Groote Kerk, sê hy het eers die waarde van die kerswaak besef toe hy sien hoe divers die bymekaarkoms is. “Dit maak my opgewonde dat kerke nie net oop kan wees vir verskillende mense nie, maar selfs ook vir ander gelowe,” sê hy.

Paul Avenant, ook ’n lidmaat van die Groote Kerk, sê dit was vir hom ’n wonderlike ervaring. “Dit was regtig ’n bymekaarkoms om liefde in ’n tyd van rou te bewys. Dit was regtig amazing hoe almal saamgestaan het – maak nie saak wat jou status, geloof of ras nie,” het hy gesê.

“As daar ooit ’n tyd was vir mense van verskillende gelowe om saam te staan teen individue, politieke leiers en geloofleiers wat verwronge boodskappe verkondig van haat, verdeeldheid en vrees, dan is dit nou,” het De Villiers verder gesê.

Dié aanval en soortgelyke aanvalle is die “produk van ’n giftige vermenging van denkwyses soos onder andere nasionalisme, rassisme, vreemdelingehaat en misplaaste geloofsoortuigings van uitverkorenheid,” aldus De Villiers.

“As die kerk dié sienings in hulle midde akkommodeer of toelaat, is hulle medepligtig,” sê De Villiers.