Promosie: MegaVoice tap sonkrag om Boodskap te versprei

Sowat helfte van die meer as 7 miljard mense wat onder mekaar die wêreld se altesaam 7,100 tale praat, is sogenaamde “oral learners” – mense wat hetsy ongeletterd is of verkies om te leer deur te luister, volgens inligting op MegaVoice se webwerf.

Dié internasionale organisasie se “hoofdoel is om die Bybel toegangklik te maak vir mense wat funksioneel ongeletterd is,” volgens Murray Louw, ’n besigheidsontwikkelingsbestuurder by MegaVoice. Daar is volgens Louw veral in Afrika groot behoefte aan klank-Bybels. Kerkbode het hom gevra: 

 Kortliks: Hoe werk die gewildste toestelle: Hoe lank laai en speel hy en hoe kies ek waarna ek luister? 

Die Envoy 2S is die klank-Bybel wat ons die meeste versprei, hierdie toestel is toegerus met ’n litiumioonbattery wat vir ongeveer 14uur kan aanhou speel wanneer hy vol gelaai is.

Die uitleg op díe sonkrag klank-Bybel is so dat enige persoon met gemak deur die hele Bybel kan navigeer tot by die gewenste Bybelboek, hoofstuk, en ’n boekmerk daar kan laat. Alhoewel meeste opnames nie die verse lees nie, kan jy binne ’n hoofstuk ’n paar sekondes vorentoe en agtertoe spring. Die uitstaan-knoppies maak dit vir blindes en siggestremde maklik om deur die Bybel te navigeer.

Dit neem ongeveer 2 ure om ’n battery vol te laai met ’n ‘USB’-laaier of  ongeveer 6 ure deur die ingeboude sonpaneeltjie direk in sonlig te plaas. 

Hoe lyk die behoefte in Afrika en het julle dalk bietjie data oor die grootte van die aanvraag in Suid-Afrika?

In Europa praat mense ongeveer 200 verskillende tale, terwyl daar op ons kontinent ongeveer 2,000 verskillende tale en dialekte gepraat word.

Veeltaligheid is een van die redes waarom die behoefte na klank-Bybels in Afrika enorm is. Ander redes sluit in ongeletterheid, armoede, swak elektriese toegang en ’n ware honger na die Woord van die Here.

MegaVoice se huidige Suid-Afrikaanse kantoor het in 2011 tot stand gekom. Die vraag na klank-Bybels in ons eie land het bestendig gegroei. Terwyl ons in 2011 hard moes werk om die bal aan die rol te kry het ons die afgelope jaar ons beste jaar nog beleef met 27,000 toestelle wat versprei is. Die meeste van hierdie klank-Bybels is in ander dele van Afrika versprei. Ons was verheug dat die Suid-Afrikaanse Biblioteek vir blindes in 2020 ’n 1,000 spelers aangeskaf het, en toe in die afgelope jaar nog 5,000. 

Wat individuele aankope betref bly die Afrikaanse 1983 vertaling en die 1953 vertaling ons twee topverkopers in Suid-Afrika.

Die feit dat die volle klank-Bybel in al ons amptelike landstale beskikbaar is maak dit ’n gewilde geskenk vir enige familievriend.

Sonkrag het reuse-potensiaal in die energiemark en julle was “vroeg” in die mark met ’n sonkrag produk. Is dit duur tegnologie om te vervaardig?

Sedert die laat 80’s toe Megavoice-stigters Tom Treseder en Ken Crowell begin woeker het met die idee van klank-Bybels wat met sonkrag werk, het daar al baie veranderinge in die tegnologie plaasgevind. MegaVoice het ’n toegewyde produk-ontwikkelingsspan wat sorg dat die nuutse bekostigbare tegnologie gebruik word. Die insetkostes en ontwikkeling is duur, en ’n onverwagse prystoename van sekere komponente sedert COVID-19 het ’n impak op ons kostes gehad.

Wat is die sakemodel waarmee julle werk – donasies of word die toestelle verkoop en wie is julle grootste ondersteuningsbasis?

MegaVoice is ’n markplek gebasseerde bediening. Daar is nie wins op spelers nie, maar wel ’n volhoubaarheidsfooi wat ons in staat stel om ons onkostes te dek.

Internasionaal word die meeste klank-Bybels versprei deur InTouch Ministries wat reeds meer as 1 miljoen klank-Bybels versprei het. In ons eie land is dit beide indivuele besighede wat klank-Bybels aankoop vir spesifieke uitreike en sendelinge wat sien hoe effektief die klank-Bybels is in hul bedieninge en dan hul eie fondswerwingsveldtogte loots.

 Hoeveel tale en Bybelvertalings onderskeidelik het julle tot julle beskikking?

Ons aanlyn Biblioteek sluit 20,000 opnames in wat klank-Bybels, dissippelskap-materiaal, kinder-Bybels, opleidingsmateriaal en ander insluit. 

Die volle klank-Bybel is in al 11 ons amptelike landstale beskikbaar. Ons is dankbaar dat die Bybelgenootskap van Suid-Afrika die inisiatief geneem het om die Bybels te laat opneem.

Daar is verskeie organisasies wat saamwerk met die opname van klank-Bybels. Een van die organisasies, Davar, ’n Suid-Afrikaanse groep, het onlangs ’n klompie nuwe Afrika-opnames vrygestel, dit sluit in: Kalenjin en Turkana van Kenia, Lozi en Tonga van Zambië en Lusoga van Uganda.

Wat is die terugvoer / stories wat jy al gehoor het deur jou betrokkenheid by MegaVoice wat jou in dié organisasie se werk laat glo? 

’n Vennoot van ons wat in die Noord-Mosambiekse provinsie, Cabo Delgado, werk, waar daar huidiglik steeds konflik woed het vertel hoe mense vir hulle sê dat hul dringend kos nodig het, maar daar is een ding wat vir hul belangriker is as kos, en dit is klank-Bybels.

’n Ander sendeling in ’n ander deel van Mosambiek, ds. Willem Nel, wat ’n Teologiese skool bedryf, het vertel hoe hy per toeval uitgevind het dat ongeletterde mense in sy gemeente self onder mekaar gereel het om weekliks bymekaar te kom om Bybelstudie te hou. Soms werk hul deur ’n hele Bybelboek in een sessie.

’n Mooi getuienis kom van Clarens du Preez wat onder plaasarbeiders in die Worcester-omgewing werk. Hy vertel hoe van die manne nie kan ophou luister na hul Bybels nie. Hoe as hul Jesus se woorde in die bergpredikasie hoor is hul so bewoë oor die verkeerdhede in hul eie lewens dat hul geïnspireerde keuses maak om sterk dwelms soos tik te los en Jesus te volg, en hoe die deurlopende luister na die Bybel hul help om by hul nuwe lewensstyl te bly.

Word 'n vriend van Kerkbode