Ladysmith: ‘Daai gevoel van medemenslikheid is baie, baie sterk’

Die mense van Ladysmith in KwaZulu-Natal kén van saamstaan in krisistye. Dít het hy gesien met die onluste in Julie laasjaar en nou weer toe die onlangse oorstroming van die Kliprivier strate in riviere verander het, talle besighede oorstroom en van die inwoners dakloos gelaat het.

Hier op hulle dorp is ’n sterk gevoel van medemenslikheid – mense hier help mekaar, vertel dr Lourens Schoeman, wat al 30 jaar in diens van die plaaslike NG gemeente betrokke is by die bou van interkerklike hulpnetwerke in die wyer gemeenskap. Kerkbode vang hom ’n paar dae na die dorp oorstroom het vir ’n vinnige telefoniese gesprek.

Hy kom pas uit ’n lang Zoom-vergadering waar oor nog hulpverleningsplanne gepraat is. Al is die paaie weer oop en die riviervlak normaal, is daar nog mense sonder blyplek of kos, wat gehelp moet word sedert die Kliprivier die vorige Sondagnag sy walle oorstroom het. Die dorp is in ’n hoefystervorm gebou en dit is die laerliggende besigheidsgebied sowel as die informele woongebiede naby die rivierwal, waar sommige mense nog in modderhutte bly, wat die ergste geraak is, vertel Lourens.

Plaaslike joernalis Claudine Senekal berig by die 150 mense, waaronder babas en klein kinders, is teen die Maandag deur reddingspanne gered wat plek-plek mense net met rubberbootjies kon bereik.

Foto: Claudine Senekal / Ladysmith Herald

Die oorstroming volg op wydverspreide swaar reëns die laaste paar weke.

Die oorstroomde hoofpaaie rondom die dorp het ook verkeersknope buffer-teen-buffer in die sakekern veroorsaak, hoor Kerkbode by plaaslike verkeersbeampte Leandra Fourie. Sy het ’n rowwe paar dae met 12 na 13 uur skofte in die skerp son agter die rug om die verkeer te help vloei. “In my loopbaan van 13 jaar is dit die ergste wat ek verkeer ervaar het,” vertel dié 37-jarige lidmaat wat al van kleins af by die plaaslike NG gemeente is.

Waar motors Sondag en Maandag in die vloedwater vasgesit het, was sy ook nie links om met haar nuwe GWM P-reeks kragwa hulle uit die water te help trek nie. Sy vertel sy het jare terug gekies om ’n verkeersbeampte te word omdat sy mense wou help.

Wat vir hom mooi is, is dat mense hier nie wag vir die kerkraad of hulle dominee om te sê hulle moet gaan help nie, sê Lourens. Dit het hy gesien met die onluste in Julie en nou weer met die oorstroming. “Mense help mekaar. Daai gevoel van medemenslikheid is baie, baie sterk en dit is baie mooi ook,” vertel Lourens wat ook op die plaaslike ekumeniese raad van kerke dien en vlot Zoeloe magtig is.

Hulle gemeente se diakonale bediening, eThekwini, werk nou saam met die VGKSA se hulpprojek Usizo sowel as die maatskaplike werkers van die plaaslike Christelike Maatskaplike Diens, die NG Kerk se diensarm in KZN. Saam-saam was hulle die laaste klompie dae baie besig met die uitdeel van kospakkies.

Foto: Claudine Senekal / Ladysmith Herald

Een van eThekwini se projekte het rondom 2 000 vroue uit die dorp se armer woonbuurte in ondersteuningsgroepe betrek. Danksy hierdie netwerk kon mense mekaar help, hetsy dit nou is met die leen van ’n koppie meel, ’n paar sinkplate of die kook van ’n maaltyd. “Ek is baie gelukkig oor hierdie projek, dit red mense se lewe,” vertel Maureen Makhaya wat die projek bestuur, ’n raakvatter wat al haar eie Bybel weggegee het vir ’n gesin wat nie een het nie.

“Ek dink in ons land is stunning, pragtige mense. Ek dink ons kyk baie keer vas in ’n klein persentasie mense wat afbreek, maar ’n groot persentasie mense, veral vroue … ek dink hulle het ’n omgee in hulle. Ek dink hulle dra ons land,” sluit Lourens af voor ons groet.

Word 'n vriend van Kerkbode