By Badisa, een van die grootste hulporganisasies in Afrika, is om toekomsbestand te wees meer as ’n tema. 

Só het Basie van Wyk, uitvoerende hoof van hierdie hulporganisasie luidens ’n verklaring (volledig onderaan) gesê tydens hulle algemene jaarvergadering wat op 10 September by die NG Gemeente Vredelust in Bellville gehou is. “Ons werk hard daaraan om nuwe vennootskappe en projekte te skep sodat ons programme volhoubaar bly vir komende generasies,” het hy bygevoeg.

Tydens die geleentheid is die Kuumba Care veldtog, met die tema ‘kleur die wêreld met sorg’, ook amptelik bekendgestel. Die veldtog, wat Badisa se verbintenis weerspieël om ’n kultuur van deernis te vestig, sal in die komende weke in hulle programme en op sosiale media ontplooi word. Die eerste Kuumba Care dag word vir 6 Maart 2026 beplan. (Lees meer oor die veldtog HIER.)

Oor die feit dat Badisa in die 2024/2025 boekjaar weereens meer as 1 miljoen mense deur middel van hulle uitgebreide sorgnetwerk bereik het, het Van Wyk gesê so ’n omvangryke impak is moontlik danksy die spanwerk tussen hulle 3,700 personeel en meer as 2,600 toegewyde vrywilligers in die Noord-, Wes- en Oos-Kaap.

Lees ook: Elders gesien | Historiese vennootskap tussen KMDR en NG Kerk op 1 Maart versterk

“Agter elke syfer is daar ’n storie – ’n kind wat beskerm is, ’n gesin wat ondersteun is, ’n bejaarde wat getroos is,” het Van Wyk gesê tydens die luisterryke geleentheid wat ook deur Jaco Londt, Wes-Kaapse Minister van Maatskaplike Ontwikkeling bygewoon is. 

Die gasspreker was Nicky Weimar, hoofekonoom van Nedbank.

Besoek www.badisa.org.za om die volledige 2024/2025-jaarverslag te lees.

Nuwe kantore

Die Badisa Bestuursprogram sal ook vanaf 1 Desember in nuwe kantore gehuisves word. Die kantore is in Merano Place, Sabiestraat 3, Bloemhof, Bellville.

• Berig aangepas met details van nuwe kantore soos gesien in VrydagNuus 19 September 2025.