ABELARDUS, PETRUS (1079–1142). Pierre Abélard kan tereg saam met enkele ander Middeleeuse teoloë beskou word as van die mees invloedryke figure in die Middeleeuse kerkgeskiedenis*. Hy was ’n Fransman en het deel uitgemaak van die vroeë Franse skolastici (Kyk by: Skolastiek). Ná ’n oorhaastige huwelik* met een van sy leerlinge, Heloise*, wat op baie probleme vir haar en vir hom uitgeloop het, stig hy die klooster* van Paracletum. Hy vind daar geen rus vir sy siel nie en wend hom na Petrus Venerabilis van die klooster van Cluny. Abélard was ’n knap teoloog maar selfs nog bekwamer as filosoof. Verder het hy as digter verskeie godsdienstige liedere geskryf.