ABISAG is ’n mooi Sunammitiese vrou wat volgens 1 Kon 1 gebring is om die bejaarde koning Dawid* geselskap te hou. Sy word die koning se persoonlike versorger, maar die teks maak dit duidelik dat hulle nie seksuele omgang gehad het nie. Abisag bevind haarself midde-in ’n stryd rondom die opvolger van koning Dawid. Adonia*¹, Salomo* se teenstander om die koningskap, vra naamlik kort ná Salomo se troonbestyging of hy wat Adonia is met Abisag kan trou. Adonia rig sy versoek tot die koninginmoeder Batseba* wat spesiale toegang tot koning Salomo het. Salomo sien die versoek van sy broer om met die vrou van die vorige koning te trou as ’n aanslag op sy koningskap. Die gevolg van hierdie insident is dat Salomo opdrag gee dat Adonia vermoor word ten einde enige teenstanders uit die weg te ruim.