EPIFANIE. Die woord epifanie kom van ’n Griekse* woord wat “verskyning” beteken. Alhoewel Jesus Christus* se heerlikheid in al sy woorde en werke geopenbaar is, word die woord epifanie gebruik om die ge­beurtenisse in sy lewe toe sy heerlikheid in die besonder sigbaar was, te beskryf. In beide die Katolieke* en Grieks-Ortodokse* kerke word die Fees van die Epifanie elke jaar op 6 Januarie gevier, en dan word die volgende herdenk: die sterrekykers* se hulde­bewyse aan die baba Jesus (Matt 2:11); die doop* van Jesus in die Jordaan* toe die stem van die Vader Hom sy geliefde Seun genoem het (Matt 3:17; Mark 1:11), en die wonderwerk* te Kana in Galilea toe Jesus water in wyn laat verander het en daardeur “sy heerlikheid laat blyk” het (Joh 2:11). Om die gebruik en verstaan van epifanie uit te brei, het pous Johannes Paulus II* die “Liggewende Geheime van die Rosekrans” ook hierby betrek. Hierdie vyf geheime is: die doop van Jesus; die wonderwerk by Kana; die verkondiging van Jesus van die koninkryk van God; die gedaanteverande­ring van Jesus op die berg (Matt 17:2; Mark 9:2; Luk 9:29; 2 Pet 1:16-18), en die instelling van die nagmaal (Matt 26:26-29; 1Kor 11:23-25).