ABNER. Sy naam beteken “(my) pa is ’n lamp”. Hy was die hoof van Saul* se leër (1 Sam 14:50). Abner was vir Saul wat Joab* vir Dawid* was. Ten spyte van die baie oorloë wat Saul geveg het, hoor ’n mens min van Abner. Hy word nie eens genoem in die vertelling oor die veldslag by Gilboa* nie. Hy onderneem om Is-Boset* onder sy vlerk te neem ná Saul se dood. Hy word uiteindelik vermoor deur Joab en sy broer Abisai* in Hebron*, omdat hy hulle broer Asael doodgemaak het tydens die oorlog in Gibeon* (2 Sam 3:22–4:1).