Laat die kindertjies na My toe kom …

Dit is die tema van die Wêreldbiddag vir vroue wat op 4 Maart vir die 86ste keer in Suid-Afrika gevier word.

Volgens me Rinel Hugo, lid van die uitvoerende komitee van die biddag in Suid-Afrika, wil dié tema, wat vanjaar deur die vroue van Kuba gekies is, die fokus laat val op God se verwelkoming van die mees gemarginaliseerde mense in die samelewing.

Kerke word aangemoedig om dié dag met ekumeniese byeenkomste te vier, sodat die Christenvroue in die land hande vat, sê Hugo.

Die biddag word wêreldwyd in sowat 170 lande gehou.

In Suid-Afrika word dit volgens Hugo goed ondersteun. Hulle komitee laat druk 100 000 programme in nege tale vir die dag.

In 2015 kon hulle R140 000 skenk aan Bybelgenootskappe en maatskaplike dienste uit die geld wat vroue tydens die biddag bygedra het.