Die NG Kerk in Wes-Transvaal het op 8 Maart ‘n halfmiljoen rand vir droogtehulp aan die landbou-organisasie Agri Noordwes oorhandig.

Dit is geld wat op twee Sondae deur middel van deurkollektes deur die gemeentes van Wes-Transvaal ingesamel is. Die Wes-Transvaalse sinodale gebied is een van die dele van die land wat erg getref is deur die droogte.

Die geld gaan nou gebruik word om die boere in die sinodale gebied wat die grootste nood het, te help.

Ds Johan Brink, assessor van die Wes-Transvaalse sinode, sê Agri Noordwes en die TLU-SA kan skenkings van gratis voer vir hierdie boere kry, maar dit moet dan aangery word.

Die geld wat die gemeentes ingesamel het, gaan nou gebruik word om vragmotors te huur om dié voer na die boere toe aan te ry.