Taizé-pelgrimstog in Kaapstad

Duisende jongmense uit Suid-Afrika, die res van Afrika en van ander vastelande het onlangs in Kaapstad bymekaargekom vir ’n pelgrimsreis.

Die “Pelgrimstog van Vertroue” (Pilgrimage of Trust), wat deur die Taizé-gemeenskap in Suid-Afrika georganiseer is, het vanaf 25 tot 29 September 2019 in Kaapstad plaasgevind.

Jongmense van die NG Kerk so­ver as Bloemfontein en Pretoria was onder die pelgrims wat die geleentheid by die St Joseph Marist School in Rondebosch bygewoon het, het dr Gustav Claassen, algemene sekreta­ris, laat weet.

Die wêreldwye Taizé-gemeenskap het gereageer op ’n gesamentlike uitnodiging van Claasen saam met ander kerkleiers soos aartsbiskop Thabo Makgoba en biskop Sipho Ziwa. Sedert Februarie 2018 het die Taizé-gemeenskap in Kaapstad die voorbereidings getref in samewerking met plaaslike kerkgemeenskappe.

Volgens Claassen was die daaglikse program gevul met sang, gebed, stilte en die viering van die geloof met ander jongmense. Deelnemers het tuisgegaan by plaaslike gemeentes wat as gasheer opgetree het.

Die Taizé-gemeenskap is ’n ekumeniese beweging met ’n sterk fokus op vrede en geregtigheid deur gebed en meditasie. Dit is een van die wêreld se belangrikste instel­lings vir Christelike pelgrimstogte. Elke jaar stroom tienduisende jong pelgrims na die klein dorpie Taizé in Sentraal-Frankryk om te deel in die lewens­wyse van die gemeenskap met gebed en stilte as die kern van die ervaring.