Valke ondersoek vermeende wanbestuur by sinode (WK)

’n Werknemer van die Wes-Kaaplandse Sinode se finansiële kantoor in Bellville word strafregtelik vir diefstal deur die Valke ondersoek. Die vrou, wat nog nie geïdentifiseer mag word voor sy nie in die hof verskyn het nie, het volgens ’n forensiese ondersoek deur die spesialisfirma Mubesko Africa R5,9 miljoen “wanbestuur”, luidens ’n verklaring wat deur ds Nelis Janse van Rensburg, moderator van die Wes-Kaapse Sinode van die NG Kerk, uitgereik is.

“Die finansiële kantoor van die NG Kerk in Wes-Kaapland het in Mei 2020 vermoed dat ’n werknemer van die sinode fondse van die Sinode van Wes-Kaapland wanaangewend het. Die saakgelastigde, ds Bossie Minnaar, is onmiddellik op 21 Mei 2020 ingelig. Die werknemer is nog dieselfde oggend met die feite gekonfronteer waarop die werknemer met onmiddellike effek bedank het,” luidens die verklaring.

Janse van Rensburg verseker gemeentes en predikante dat hulle sinodale aandeel en pensioenfondse veilig is.