Op die tweede laaste dag van die 18de Algemene Sinode van die NG Kerk het ’n paar sinodegangers swart hempies aan met die woorde: “Haar naam is Liezel de Jager”.

Ds Liezel de Jager (38) was die dominee by die NG Kerk Suidkus in KwaZulu-Natal. Sy is op die oggend van 13 Oktober 2021 by haar huis vermoor, nadat sy saam met vriende gaan hardloop het. Dit is reeds twee jaar later en daar is geen vordering in haar saak nie. Haar nagedagtenis is Woensdag met ’n oomblik van stilte herdenk.

Actionsociety.co.za berig dat dit 590 dae sedert die moord van ds Liezel de Jager is, en die Suid-Afrikaanse Polisiediens (SAPD) het steeds geen lykskouingsverslag of ’n volledige forensiese ondersoek deurgevoer nie.

Dit is vir dié rede dat sinodegangers T-hemde dra met die woorde: “Haar naam is Liezel de Jager”. Dit is nie sonder presedent vir afgevaardigdes by ’n Algemene Sinode om op ’n Donderdag van die sinode swart te dra nie. Thursdays in Black het ten doel om die vele verhale van geweld teen vroue sigbaar te maak.