“Ons leef daagliks in vrees,” het Zodwa Booi, ’n Wes-Kaapse leier van Operation Dudula op Dinsdag 30 Junie verduidelik oor haar organisasie se energieke teenstand teen onwettige immigrante.

Booi verwerp die stelling dat dit ’n veralgemening is om te beweer dat veral buitelanders misdaad pleeg. Sy gee wel toe dat Suid-Afrikaners ook hulself op groot skaal daaraan skuldig maak. “Ons moet ontslae raak van mense wat nie van hier is nie, dat ons ons eie misdadigers kan regsien,” het sy tydens ’n betoging in Waalstraat in die Kaapse middestad aan Kerkbode gesê.

Talle ander betogings teen onwettige migrante het Dinsdag in die provinsie en landwyd plaasgevind. ’n Klipgooi met Waalstraat af, het sowat 20 geloofsleiers in stil protes op die trappe van die St George-katedraal vergader, met A4-blaaie waarop woorde soos waardigheid en geregtigheid in swart ink gedruk is.

Die vorige aand het geloofsleiers gaan hulp verleen by die Vlugtelingsverwelkomingsentrum in Epping, waar byna 2 000 Zimbabwiërs wie se papierwerk nie in orde is nie in snerpende koue op repatriasie gewag het.