Die NG Kerk in Namibië gaan herbesin oor sy funksionering en oor sy bande met die Algemene Sinode.

Die kerk se sinode het ‘n taakspan van agt lede aangewys wat ” ’n proses van besinning, raadpleging en besluitneming oor die toekomstige funksionering van die NGKN” moet begelei. Hulle moet binne vier maande terugvoer gee aan die moderamen wat die saak verder moet hanteer.

Die taakspan moet onder meer aandag gee aan breë ekumeniese verhoudinge, byvoorbeeld met die Algemene Sinode. Hulle moet ook kyk na plaaslike strukturering, teologiese opleiding en nuwe Reformatoriese geloofsgemeenskappe.

Ds Clem Marais, skriba van die sinode, het by navraag gesê daar is lank reeds ‘n gevoel in Namibië dat die verband met die Algemene Sinode aandag moet kry. Hy sê daar is ‘n sterk gevoel dat dit nie afskeiding moet wees nie, maar wel herskikking.

Die taakspan wat die opdrag gekry het, bestaan uit drr. André Olivier (sameroeper), Manus Olivier, De Wet Strauss, Jan Woest en di Dirk de Vos, Johannes de Koning, Johannes Maritz en Thijs van der Merwe.