Die graad 1- en graad 2-leerders van Soetendal Primêre Skool buite Wellington se maskers kon nie eens hulle breë glimlagte op 17 Februarie wegsteek nie.

Bybel-Media en die SA Voedingsprojek het hande gevat om te sorg dat dié leerders, wat van omringende plase afkomstig is, met skryfbehoeftes en boeke vir 2021 gewapen is.

“Bybel-Media het ’n groot hart vir kinders. Ons het gehoor dat die jongste leerders van Soetendal boeke en skryfbehoeftes benodig. Daarom het ons 100 bederfpakkies met Bybelse aktiwiteitsboekies en ook ’n groot klomp skryfbehoeftes gegee,” het Amanda van der Westhuizen, Bybel-Media se bemarker gesê.

Dié skenking vorm deel van Bybel-Media se Kinderkerskousprojek wat veral op die geestelike ondersteuning van kinders fokus.

Ada Joubert, stigter van die nieregeringsorganisasie (NRO) SA Voedingsprojek, skenk gereeld kos en benodigdhede vir dié skool, wat reeds die afgelope 61 jaar vir die skoling van die laerskoolleerders van die omgewing verantwoordelik is. Die SA Voedingsprojek het vir elke leerder ook ’n sakkie met skryfbehoeftes sowel as ’n kospakkie gegee.

• Klik HIER meer inligting oor die Kinderkerskousprojek en hoe jy kan betrokke raak.
• Kontak amanda@tydskrifte.co.za vir die moontlikheid om deur die Kinderkerskousprojek ondersteun te word.
• Lees ook: Kersfonds: BM en Kerkbode fokus op leesgoed vir kinderhuise en skole