Kersfonds: BM en Kerkbode fokus op leesgoed vir kinderhuise en skole

Dit is weliswaar nog ’n bietjie vroeg vir Kers­geskenke koop, maar Kerkbode se Kersfonds­span is reeds aan ’t woeker met ’n plan om lidmate vanjaar in staat te stel om ’n “geestelike geskenk” direk aan ’n kind te gee.

Die idee is eenvoudig, vertel Hannelie Matthee, finansiële be­stuurder en donateur-skakelpersoon by Bybel-Media (BM) op Wellington, met wie Kerkbode kragte saamsnoer vir hierdie projek. “Ons noem dit KinderKersKous vol BybelBoeke. BM wil kinders en jong­men­se bederf met geestelike boeke wat ons sal aflewer by kinderhuise en skole in die nuwe jaar (2021).”

Die ontwikkeling en ver­sen­ding van hierdie spreekwoor­delike geskenk-“kou­se” word moontlik gemaak deur afson­derlike donateurs en gemeen­tes wat die projek ondersteun. Dit is Kin­derbybel-stories, By­belaktiwiteitsboeke en ander opvoedkundige boeke, ver­duidelik dr Nico Simpson, die nuwe hoof- uitvoerende beampte van BM.

Kerkbode-lesers ondersteun jaarliks op ruimhartige wyse die Kersfonds. In 2019 het ses individue, een sinode en 30 gemeentes bydraes gelewer en is ’n bedrag van altesaam R158 705,35 ingesamel. Vanjaar sal Kerkbode steeds werk met haar amptelike lys van beguns­tigdes om te verseker dat ook daardie instel­lings en die kinders wat daar woon op die geskenklys bly en kan baat vind by die leesstof en besighouboeke.