NG predikante kan ook aansoek doen om entstof te ontvang

NG predikante kan ook aansoek doen om as werkers in die voorste linie geklassifiseer te word om die Covid-19-entstof te ontvang.

Dít kom na ’n versoek van die Suid-Afrikaanse Raad van Kerke (SARK) om predikante, priesters en pastore die geleentheid te gee om, met die gebruik van hulle eie diskresie, hulle besonderhede aan die SARK deur te gee indien hulle oortuig is dat die aard van hulle bediening sodanig is dat die intenting nie net vir hulleself beskerm nie, maar ook vir die mense wat hulle bedien, volgens ’n brief van dr Gustav Claassen, algemene sekretaris van die NG Kerk aan alle NG predikante.

LUISTER: Covid-19-verliese inspireer Ruan Josh tot roerende lied

Claassen maak ook melding van nuusberigte in die media wat aanvoer dat predikante onregverdig bevoordeel word en die geleentheid misbruik om aansoek vir ’n entstof te doen. Rapport het twee weke gelede berig dat “Politici, premiers en predikante wou indruk in die entstof-ry”, maar dat die Medisynebeheerraad ingegryp het. Dié verwarring het ontstaan weens ’n verklaring wat deur president Cyril Ramaphosa uitgereik is dat “premiers, LUR’e en leiers uit die burgerlike samelewing, geloofsorganisasies en tradisionele leiers” in die openbaar ingeënt sal word, het Rapport berig.

NG predikante het tot en met Vrydag 5 Maart om 10:00 om hulle aansoeke vir Sophia de Kock, persoonlike assistent van die algemene sekretaris by sophiadk@ngkerk.org.za te stuur.


Word 'n vriend van Kerkbode