Terwyl daar dikwels oor verskille in die NG Kerk gepraat word, het dr Lourens Bosman Maandag by die vergadering van die Algemene Sinode twee grafieke op ’n grootskerm voor sinodegangers gegooi om te wys waar daar ook konsensus lê. Oor wat die Bybel ten diepste is en die eise wat die NG Kerk se Drie Formuliere van Eenheid aan dominees stel, was daar groot konsensus, blyk uit data wat deur middel van die Predikantepaneel-opname van 2022 ingesamel is.

Bosman se bydrae was deel van ’n wydlopende voorlegging deur die Algemene Sinode se Taakspan Leer en Aktuele Sake (ATLAS). ATLAS se taak is om die kerk met teologiese navorsing te bedien ten opsigte van aktuele, leerstellige en etiese aangeleenthede.