Kunstenaar Zanne Stapelberg tree Vrydagaand 2 Augustus saam met haar top studente op by die NG Kerk Panorama in wat beloof om ‘n boeiende reis deur flieks en musiekblyspele te bied.

Dit is volgens die Christelike maatskaplike sorgorganisasie Badisa wat die geleentheid gedoop het die Cuddle for a Cause-aand om Kuumba Care bekend te stel,  hulle innoverende nuwe fondswerwing gemik op kinderbeskerming.

Die geleentheid is ’n belangrike fondsinsameling vir die Kuumba Care-program sê Linda Awerbuch, maatskaplike dienstebestuurder by Badisa Tygerberg. Sy vertel meer, “As aangewese kinderbeskermingsorganisasie, is ons primêre doelwit die voorkoming van kindermishandeling en -verwaarlosing wat die sentrale fokus is van die Kuumba Care-program. 

“Dit is hoekom ons by hierdie geleentheid ’n nuwe reeks bekendstel van Kuumba Care-produkte en -klere. Deur dit te doen, beoog ons om ons program selfonderhoudend en beter toegerus te maak om te kan voorsien in die wesenlike behoeftes van ons te gemeenskap.”

Kuumba Care is in 2022 gestig deur Badisa Tygerberg. Dit is ‘n Swahili-woord wat “kreatiwiteit” beteken. Vir Badisa verwoord dit dat hulle kreatief soveel doen as wat hulle kan op hulle manier om ‘n gemeenskap na te laat wat mooier en voordeliger is as wat dit was. 

Kaartjies is te koop by Webtickets.

• Hierdie artikel verskyn as deel van ’n inhoudsvennootskap tussen Kerkbode en Badisa.