Vakature: Voltydse leraar vir ’n vaste termyn (drie jaar)

Met biddende afhanklikheid nooi die kerkraad van NG Gemeente Boshof alle gelegitimeerde proponente, predikante en emeritusleraars uit om aansoek te doen vir die onderstaande pos.

Sluitingsdatum: 31 Oktober 2025.

Dienstermyn: Vaste termyn (drie jaar).

Gemeenteprofiel: Boshof-gemeente is ’n hegte plattelandse gemeente wat in 1856 ge-stig is. Die dorp is geleë in die Wes-Vrystaat; 55 km van Kimberley en 120 km van Bloemfontein. Boshof is ’n diverse, maar sterk landbougerigte gemeenskap. Volgens die databasis van die gemeente is daar tans 533 lidmate – waarvan 38,5% bo die ouderdom van 60 is, 17,7% tussen die ouderdom van 46-59, 24,2% tussen die ouderdom van 19-45 en 19,5% tussen die ouderdom van 0-18 versprei oor sewe plaaswyke en sewe dorpsgroepe met een leraarspos. Huis Goedversorg, sentrum vir bejaardes, se inwoners skakel ook as lidmate in by die gemeente. Alhoewel die gemeente hoofsaaklik uit ouer persone bestaan, raak jonger gesinne toenemend deel van die gemeente.

Leraarsprofiel: Die kerkraad is op soek na iemand, lojaal teenoor die NG Kerk en kerkverband, wat met energie en entoesiasme die gemeente kan opbou deur persoonlike kontak met lidmate en die breër gemeenskap. Die persoon moet aanpasbaar wees op die platteland en moet kan inskakel by alle ouderdomsgroepe. Hy/sy moet kan saamwerk in groepsverband, maar ook outonoom kan funksioneer. Evangelisasie en pastorale versorging moet voorrang geniet. Innoverende maar Woordgetroue prediking is vir die gemeente baie belangrik. Ervaring of opleiding in berading sal voordelig wees.

Pligte: Soos omskrywe in Artikel 9 van die Kerkorde.

Vergoeding en voordele:

Traktement sal met die suksesvolle kandidaat beding word. ’n Ruim pastorie met ’n groot tuin word voorsien (onderhoud van tuin is ingesluit).

Aansoek:

Volledige CV met minstens vier verwysings asook kontaknommers.

Die kerkraad vereis van alle aansoekers om die toepaslike vraelys volledig te voltooi en saam met die aansoek per e-pos in te dien.

Die vraelys kan aangevra word by die kerkkantoor via e-pos: ngkerkboshof@gmail.com of telefonies/WhatsApp op 064 690 1618.

Diensaanvaarding: 1 Februarie 2026.

Navrae:

Kerkkantoor: Nerine Ebersohn: 064 690 1618.

Beroepingskommissie voorsitter: Ds Lindo Pieters: 067 530 6738.

Leierouderling: Andrie de Kock: 082 345 8990.

Die kerkraad behou die reg voor om nie ’n aanstelling uit die aansoeke te maak nie.