Dr Albert Alberts van Waterkloof skryf:

Na aanleiding van ds Piet Otto se brief “In liefde en waarheid” (Kerkbode, 15 April). Ds Otto het basies met my saamgestem dat ’n mens die Skrif kan interpreteer soos dit ’n mens pas. Hierdie is egter ’n onverkwiklike gesprek en dit is onwaarskynlik dat die twee kante mekaar sal ontmoet.

Die hooftema van my brief was egter dat ons gemeente besluit het om met sagte oë na gays te kyk. Die primêre rede daarvoor was dat ons die Skrif in die konteks van die tyd toe dit geskryf is, geïnterpreteer het. Ons het die onbetwisbare wetenskaplike kennis in ag geneem. Ons het ons liefde vir ’n gay mens in ag geneem.

Om die situasie op te los moet ons besluit om mekaar in liefde te ontmoet. Die sinodebesluite kan afge­wentel word na die gemeentes. Griekwastad se ge­meen­te kan besluit om nie die gay-besluit te im­ple­menteer nie. Ons gemeente vra egter die vryheid om gay mense te akkommodeer. Deur te appelleer dwing ’n paar gemeentes (daar is 18 sover ek weet) hulle ge­sag op almal af.

Kan ons nie maar mekaar die vryheid gun nie?

Lesers kan briewe rig aan Die Redakteur, Kerkbode en dit na kerkbode@tydskrifte.co.za stuur. Korter briewe, verkieslik nie langer as 300 woorde nie, geniet voorkeur by plasing. Briewe sal redaksioneel versorg word en kan ook verkort word.