Sinode: Dit gons oor dié video

’n Video wat kykers insae gee tot voorbeelde van die grensoorskrydende en plek-plek skokkende opmerkings waaraan vroue in die amp blootgestel is, het sinodegangers Dinsdag by tye na hul asems laat snak. In die video word die uitlatings deur mans voorgelees. Dis opmerkings soos dié:

“Jy is so ’n mooi dingetjie, die mans gaan nie die preek hoor nie.”

“Ons wil nie jou onderarms sien met die seënuitspraak nie.” 

“’n Vrou kan nie nagmaal bedien nie. Dit klink net nie reg nie.”

“Weet jy watter onreg doen jy jou man en kinders aan?”

Hierdie is net ’n paar van die opmerkings wat in 2019 deur mans én vroue in NG gemeentes gemaak is.

Die video was deel van ’n tipe “show, don’t tell”-benadering wat dr Carin van Schalkwyk van die Vrystaat Sinode gevolg het tydens ’n voorlegging oor gendergelykheid op die derde dag van die Algemene Sinode-sitting in Benoni. 

(Waarskuwing: Hierdie video mag sommige kykers ontstel).

Voor die speel van die video het Van Schalkwyk vertel hoe sy as jong vroulike predikant in Philippolis gou besef het dat sy ’n “kwotaspeler” is. Lidmate het verwag dat sy as vrou nie kan huisbesoek doen nie en ook nie op grondpaaie na lidmate kan ry nie. “En wat gaan gebeur as jy kinders kry?” is ’n vraag wat telkemale aan Van Schalkwyk gevra is.

Hierna het dr Fanie Cronjé, Van Schalkwyk se mede-aanbieder, gesê dat hulle nie vir ’n “kwotastelsel” vra nie. “Ons pleit vir gemeenskaplike vryheid,” het Cronjé gesê. 

Volg regstreekse nuusdekking van die sinode hier.