Die nuwe moderator van die NG Kerk het die media Woensdagoggend terugverwelkom in die Algemene Sinode ná hy Dinsdagmiddag kort voor middagete gereël het dat onder andere Kerkbode se verslaggewers nie op die urelange gesprek oor leerstellige besware en selfdegeslagverbintenisse mag insit nie.

Lees ook: Onderlinge verskille – asook beriggewing daaróór – bring nodige balans

Ds Jan Lubbe het vir die “draers van die boodskap” van die verhoog af terugvoer gegee en gesê dat ’n kleiner groep aangewys word om ’n “voorstel na die vergadering te bring” oor die hantering van die 2019-besluit (oor selfdegeslagverbintenisse). “Ons gaan deur die loop van die dag werk aan ’n voorstel,” het Lubbe Woensdagoggend gesê. Oor die vorige dag se gesprek het Lubbe gesê: “Dit was nie maklik nie.”