Geregtigheid en klimaatsverandering, Israel en Gasa, die gebruik van die woord “apartheid” en ’n jeuginisiatief rondom die Swart Donderdag-veldtog teen geweld teen vroue asook ’n pelgrimstog tussen kerke.

Dit is van die sake waaroor meer as 150 kerkleiers saam met ander afgevaardigdes van regoor die wêreld vanaf 18 tot 24 Junie in Johannesburg in gesprek gaan wees. Die tema is ‘Pilgrimage of Justice, Reconciliation, and Unity’. In totaal word meer as 300 mense verwag vir die tweejaarlikse vergadering van die Sentrale Komitee, die hoofbestuursliggaam van die Wêreldraad van Kerke (WRK) in die tydperk tussen algemene vergaderings.

Biskop prof dr Heinrich Bedford-Strohm het gesê dit is altyd ’n spesiale geleentheid wanneer hierdie komitee (waarvan hy as moderator optree) saamkom en bygevoeg dit bly ’n “ekumeniese wonderwerk” wanneer konsensus bereik word, ook met kontroversiële kwessies. “We can show that an exchange with mutual respect and a readiness to really listen to each other is possible on the basis of our common faith,” is hy aangehaal in ’n onlangse WRK-nuusberig.

Die NG Kerk se stem gaan ook opklink by monde van dr Gustav Claassen en dr Nioma Venter. Claassen is sedert sy verkiesing op die Sentrale Komitee in 2022 ook gevra om op verskeie staande komitees te dien. Hy is betrokke met die reël van hierdie vergadering in Johannesburg.

Venter is deur die NG Kerk se Algemene Sinode afgevaardig as waarnemer (sy het begin 2023 as algemene sekretaris oorgeneem na Claassen se uittrede en sy dien ook op die SARK se leierskap as tweede vise-president). 

Lees ook: Só klink uiteenlopende navrae, vertel Nioma Venter ná jaar in die pos as algemene sekretaris van die NG Kerk

Hou Kerkbode dop vir meer hieroor.