Langs die indrukwekkende klipkerk op Vryheid staan daar deesdae talle groot groen watertenks.

Vir ds Ferdinand van Niekerk is dit ’n teken dat die kerk besig is waarmee hy moet besig wees – om te dien, om as ’t ware voete te was en om ’n verskil in die gemeenskap te maak.

Die droogte het Vryheid kwaai getref. Twee van die dorp se drie damme is leeg. Hulle het die afgelope tyd net by tye water in die krane en die nuus het gekom dat die water nou heeltemal afgesny gaan word.

Tensy daar iets kom soos die destydse sikloon Demoina, sê Van Niekerk, is daar ook nie ’n vooruitsig dat die situasie gou gaan verander nie. Die munisipaliteit is besig met krisisbestuur.

Maar die hulp het van oral af ingestroom. Van Niekerk sê hulle het waterskenkings gekry van skole en kerke, van ondernemings en van individue. Dit het gekom uit Pretoria, Johannesburg, Secunda, Richardsbaai, Newcastle, Nelspruit en Piet Retief.

Op Vryheid het die NG Kerk die sentrum geword waar die water ontvang word en waar mense kan kom haal. Maatskappye het die watertenks geborg en vrywilligers help sorg dat dit eweredig verdeel word sodat almal kan kry.

Van Niekerk meen die eintlike krisis lê nog voor. Die nood gaan nog groter word.

Vir die kerk, sê hy, is dit ’n voorreg om te doen waarmee hy lankal besig moes wees – om te dien.