“Ons wil graag die insigte (uit 2015 se DiacAfric-konferensie) na die praktyk van alledaagse gemeentewees bring.”

So skryf dr Botha van Aarde van die Algemene Sinode se Taakspan vir Missionale Diakonaat oor die DiacAfric-konferensie wat van 31 Mei tot 1 Junie by die Padre Pio Spiritualiteitsentrum in Pretoria gehou word.

Die oorhoofse tema vir vanjaar se konferensie is Armoede: geleentheid of verleentheid vir ʼn missionale gemeente. Dit word in drie subtemas hanteer.

Dr Lourens Bosman en dr Willie van der Merwe sal praat oor missionale transformasie en diakonaat. Daarna sal Van der Merwe praat oor gemeentepraktyke aan die hand van navorsingsresultate van die Hugenote Kollege. Mev Nadia von Wielich sal dan praat oor die integrasie van gemeentelike diakonaat en kerklike maatskaplike dienste.

Inskrywings moet voor 25 Mei gedoen word. Inskrywingsgeld is R300 en akkommodasie is beskikbaar teen R330. Navrae kan gerig word aan Rinel Hugo by 012 342 0092 of rinelh@ngkerk.org.za.