Die Appèlkommissie van die Algemene Sinode het begin om die appèlle teen die besluite van die Algemene Sinode van 2015 te hanteer. Dit sluit appèlle in teen die besluite oor verhoudings tussen mense van dieselfde geslag, maar ook appèlle teen die besluit wat sinodes die reg gee om hul eie belydenisgrondslag uit te brei.

Ds Thijs van der Merwe, voorsitter van die appèlkommissie, sê hulle het ontvangs erken van al die appèlle. Die appellante is versoek om te oorweeg om hulle appèlle liewer as beswaarskrifte in te dien. Party het aangedui dat hulle dit sal doen, ander het aangedui dat hulle wil volstaan met appèlle en van nog ander word antwoorde nog afgewag.

Oor die drie verskillende regsmenings wat aangedui het dat die hele appèlproses ongeldig is, sê Van der Merwe dit is ongetoetste opninies. Hulle werk volgens die kerkorde wat wel voorsiening maak vir appèlle.

Die kerkorde bepaal ook dat hulle dit in camera moet hanteer. Daarom kan hy nie oor die appèlle self praat nie.

Hy het wel gesê hulle hanteer die tegniese sake eerste.

Die appèlkommissie het hulle vergadering van twee dae in Pretoria op Woensdagmiddag, 21 September, afgesluit. Dit was hulle tweede vergadering. Hulle sal weer vroeg in Oktober vergader.