Moenie oorskat óf onderskat nie

Hierdie is 'n opiniestuk.
Die skrywer se standpunte weerspieël nie noodwendig dié van Kerkbode nie.

Dit was blykbaar Bill Gates wat eerste gesê het: “Most people overestimate what they can do in one year, but they underestimate what they can do in ten years.”

Twee van my goeie vriende is besig om doelgerig vir hulle eerste maraton te oefen. Hulle is albei 60-plussers en bou al vir ’n klompie jare geleidelik hier­natoe op. Hulle toewyding is indrukwekkend. Weeksoggende is hulle douvoordag uit vir agt tot vyf­tien kilometer Saterdae is hulle vir ure op die pad om myle in die bene te kry. Hierdie eerste maraton is vir hulle belangrik genoeg dat hulle baie noukeurig by hulle oefenprogram hou. Nie een is lus om op die groot dag op te daag en dan nie klaar te maak nie.

’n Mens word nie in ’n week of twee fiks genoeg vir ’n maraton nie. Dit vat tyd, dit vat ure op die pad. Net so min word ’n gemeente in ’n 40 dae-veldtog, met ’n preekreeks of selfs met ’n jaartema, ’n kerk waar ge­stuurd­heid deel is van die kultuur. Dit vat tyd, dit vat jare se toewyding.

Die eerste vraag is natuurlik of dit vir ’n gemeente se leierskap belangrik genoeg is, of die dominee en kerkraad bereid is om die ure in te sit, om te volhard op die pad?

Die antwoord hierop is eintlik voor die hand liggend. Ons gestuurde roeping móét vir ’n gemeente en sy leiers belangrik wees want dit is vir God be­langrik. Dit is waarvoor God ons bymekaarmaak. Die Bybel is nie onduidelik daaroor nie: Wanneer Jesus sy aardse werk klaarmaak, stuur Hy sy volgelinge uit na die wêreld. Die boodskap van God se koninkryk wat aanbreek, is vir die wêreld bedoel. Ons moet ons hieraan toewy want dit is vir God belangrik.

Die tweede vraag is oor “hoe?” – hoe doen mens dit? Pasop om vir ervare hardlopers uit te vra oor hulle oefenprogram, hulle kan jou vir ure besighou. Maar een van die belangrikste dinge wat hulle sal sê, is om net te begin. Begin klein, met twee of drie kilometer. En hou aan.

Om ’n effektiewe gestuurde gemeente te lei, vra vir vaardighede. Dit is dinge wat mens kan aanleer. Daar is baie ervare leiers wat met graagte hulle kennis en ervaring sal deel. Maar die belangrikste raad wat hulle sal gee, is om op te hou teoretiseer en te begin. Gee die eerste klein treetjies, vat die koers agter God aan na die wêreld toe.

En hou aan. Moenie oorskat wat julle in een jaar kan doen nie, maar moet veral nie onderskat hoe ver julle in tien jaar kan vorder nie.

▶ Dr Lourens Bosman is die algemene bestuurder in die kantoor van die Algemene Sinode.