Dié hoofstad gee hoendervel

Rome is ’n toeristemagneet – veral vir geskiedenisliefhebbers: Om elke hoek en draai word besoekers verras met kuns en kerk. Maar vir dié PhD-student in Nuwe Testament het die volgende paar plekke met ’n onlangse besoek aan die Italiaanse hoofstad uitgestaan.


Ek kan nie anders as om die Ro­meinse Forum, Colosseum en die Titus-Triomfboog saam te bespreek nie. Dié drie bekende bakens is minder as 5 minute se stap van mekaar geleë. Máár moet nie onder die indruk verkeer dat ’n mens nie ten minste ’n halwe dag daar kan vertoef nie.

Colosseum

Die ontsaglikheid van die Colosseum het my onkant betrap. Dié enorme amfiteater is tussen 72 en 80 nC deur Jood­se gevangenes gebou. Die Colosseum is ovaalvormig en 187 meter op sy hoogste. Wanneer ’n mens op die boonste verdieping van die Colosseum staan en die omvang daarvan beleef, is dit geen wonder dat dié baken die simbool en lewe van antieke en moderne Rome weerspieël nie. Die doel van die Colosseum, ’n plek waar vermaak verskaf word, is baie dieselfde as wat ons in die moderne tyd by ’n groot stadion sal vind. Die tipe vermaak verskil egter hemelsbreed. Een van die bekendste vermaaklikheidsaktiwiteite vir die on­ge­veer 50 000 toeskouers was die gladia­torgevegte. Die gladiators was opgelei om tot die dood teen mekaar, ander mense en wilde diere te veg. Tydens die inlywing van die Colosseum is daar tot 9 000 wilde diere in slegs 100 dae dood­gemaak. Die amfiteater is ander tye weer met water gevul waar daar dan skeepsgevegte plaasgevind het. Die Colosseum moet beslis beide in die daglig en aand besoek word.

Die Colosseum moet beslis beide in die daglig (bo) en aand (onder) besoek word.

Romeinse Forum en Palatine-heuwel

Slegs 40 meter van die Colosseum lei ’n straatklippaadjie jou na die Romeinse Forum. Dié antieke handelsentrum was die hartklop van ekonomiese, politieke en godsdienstige aktiwiteite van antieke Rome. Die reghoekige forum bestaan uit vele oorblyfsels van winkels, standbeelde en tempels. Die forum is in die vallei tussen die Palatine- en Capitol-heu­wels geleë. Dit is die beste om die Romeinse forum van die immergroen Palatine-heuwel se kant te benader. Die heuwel is ’n boom- en blomryke gebied wat beslis ’n besoek werd is. Bekende keisers het hulle paleise op dié heuwel gebou en die oorblysels is steeds sigbaar. As ’n mens oor die heuwel stap lê die oorblyfsels van die Romeinse Forum voor jou uitgestrek.

Titus-Triomfboog

In die suidoostelike rigting van die Romeinse Forum, op die Via Sacra-pad wat na die Capitol-heuwel lei, staan die Titus-Triomfboog. Die Via Sacra-pad, die hoofstraat van antieke Rome, loop na verskeie godsdienstige geboue van die Romeinse Forum asook na die Kolos­seum. Ek sal voorstel dat besoe­kers die klipperige Via Sacra-pad aandurf om die merkwaardige boog te aanskou. Dié boog is na keiser Titus se dood in 82 nC opgerig ter ere van sy verskeie oorlogsoorwinnings, onder an­­dere die vernietiging van Jerusalem in 70 nC. Indien jy Rome soos ek op ’n snikhete somersdag besoek, moet asseblief nie die kraan met gratis yskoue suiwer water onder die koelteboom reg oorkant die triomfboog miskyk nie.

Panteon

Die Panteon, wat “al die gode” beteken, is beslis ’n besoek werd. Dié Roomse baken het die klassieke voorkoms van ’n antieke Romeinse tempel. Alhoewel die tempel as een van die bes behoue antieke bakens in Rome voorkom, is die gebou meer as 2 000 jaar gelede totaal deur ’n brand verwoes. Die gebou wat van voor af vierkantig voorkom, is in die binnekant halfsirkelvormig. Die koe­pelvormige binnekant is versier met beeldhouwerke, kleurvolle geverf­de mure en antieke pilare. Toegang tot die Panteon, wat net ’n hanetreetjie van die bekende Trevi-fontein geleë is, is gratis.

San Clemente Basilika

Dit was ’n ongelooflike ervaring om al hierdie bekende antieke bakens te besoek, maar die een wat my altyd sal bybly is die besoek aan die minder bekende San Clemente Basilika slegs 550 meter se stap van die Colosseum. Die huidige basilika is in 1200 nC gebou. Wanneer ’n mens die kerk binnestap besef jy nie met die eerste oogopslag watter geskiedkundige juweel dié basilika is nie. By dié bestemming, kry jy drie vir die prys van een. Die basilika, wat opgedra is aan St Klemens, bestaan uit drie vlakke uit verskillende periodes in die geskiedenis. Met die intrapslag word jy verras deur die mooi beelde, kuns en mosaïek. Dié huidige basilika op grondvlak is egter reg bo-op die eerste basilika gebou wat in die vierde eeu opgerig is. Dié vierde-eeuse basilika is weer bo-op ’n huis gebou wat uit die eerste eeu dateer. Die huis is redelik groot met verskeie ka­mers en moes waarskynlik aan ’n Ro­mein­se edelman behoort het. Die huis het ook vir ’n ruk as ’n aanbiddingsplek vir Jesusvolgelinge in die eerste eeu en vir Mitras-aanbidders tydens die twee­de eeu gedien. Ongelukkig mag daar slegs by die huidige basilika foto’s geneem word. As Nuwe-Testamentikus het dit my hoendervleis gegee om in ’n eer­ste-eeuse huis rond te loop en te besef dat die mense van wie ek elke dag in my PhD skryf werklike vlees-en-bloed men­­se was en wat op die plek waar ek nóú staan óók gestaan het. Wat ’n voorreg was dit nie!