‘Hierdie apps dra my deur grendeltyd’

Watter slimfoontoepassings gebruik jy om jou deur ure se inperking te kry? Hetsy om produktief te wees, verveeldheid hok te slaan of geestelik te groei. MARLI VAN EEDEN het ’n paar jongmense gaan vra.


Moira Etsebeth (26), hon­neurs­student in siel­kunde aan Unisa

“Ek is mal oor Pinterest, ’n app waarop allerlei foto’s, prentjies en idees uitgeruil word. Ek soek gewoonlik nuwe resepte daarop omdat ek mal is oor kosmaak. Ek maak elke dag kos waarvan ek die resepte omtrent almal op Pinterest gekry het. Ek probeer allerhande nuwe fancy disse, want ’n mens raak maar verveeld vir dieselfde kos oor en oor. Ek hou ook daarvan om te bak, veral nou tydens lockdown is daar meer tyd daarvoor. Ek het al so baie koekies gebak!

“En dan Mr Delivery vir die dae wat ek wel nie lus is vir kosmaak nie! Nou dat ons mag kitskos koop tydens Vlak 3 van die inperking het ek be­slis hierdie app al meer be­gin gebruik. Ek dink ook dit is goed om plaaslike restaurante gedurende hier­die moeilike tye te on­der­steun waar ’n mens kan.

“Ek gebruik ook die oefen app SWEAT, waarop ek oefenprogramme van die bekende Austra­liese fiksheidsinstruktrise Kayla Itsines volg. Hulle het nou oefenprogramme waar hulle meer fokus op oefeninge wat jy by die huis kan doen met min gym toerusting, so dit is perfek vir lockdown terwyl ’n mens nie na die gym toe kan gaan nie. In die oggende tussen 6 uur en 9 uur gaan stap ek dus en dan daarna doen ek ’n paar van die oefeninge sodat ek my dag op die regte noot kan begin.”


Reinhart Buenk (27), ingenieur

“Tydens die inperking het ek nogal baie die app LinkedIn begin gebruik wat op die beroepswêreld gefokus is. Dié app help my om in aanraking te bly met wat in die be­roepswêreld aangaan. Dit is ook lekker om nou my CV aanlyn op datum te kry terwyl ek meer tyd op hande het. Ek doen ook aanvullende kursusse in my veld om my vaardig­hede op te skerp terwyl dinge by die werk op die oomblik stiller is as ge­volg van die inperking. So­doende voel dit vir my ek benut my tyd produktief.

“Ek hou ook van die Bible App omdat dit nie net die Bybel vir ’n mens aanlyn met die klik van ’n knoppie bied nie, maar ook handige Bybellees­planne het om te volg. Hierdie Bybelplanne help my om Bybelstudie te doen terwyl ’n mens nie tans in selgroepies bymekaar mag kom nie.”


Leo Cordom (21), honneursstudent in joerna­listiek aan die Universi­teit Stellenbosch

“Die app wat ek seker die meeste op die oomblik gebruik is NetNuus. Verder geniet ek dit om sosiale media apps soos Face­book, Twitter en Insta­gram te gebruik om­dat dit my die geleentheid bied om te sien wat in al my klasmaats se le­we aangaan en met hul­le te connect nou dat ek hul­le nie in persoon kan sien nie. Dié apps bied vir my ’n geleentheid om vir ’n oomblik te ontsnap van die realiteit wat ons tans in die gesig staar omdat dit soms oorweldigend kan raak.

“Ek is mal oor TikTok, ek dink dis beslis een van die nuutste giere onder die jeug! TikTok is basies ’n app waarop jy kort video’s deel, enigiets van video’s waar jy ’n dan­sie doen, video’s waar­op jy saam met liedjies lip sync of karaoke, of selfs snaak­se video’s soos video’s waar jy iemand ’n poets bak. Dis lekker om te sien waarmee almal opkom, of om jou eie video’s te maak. Die app bied ure se vermaak as ’n mens ver­veeld is.”


Marguerite Wolfaardt (24), sosiale media-be­stuurder en joga-in­struk­trise

“Ek is mal oor DuoLingo, ’n app wat ’n mens kan gebruik om ’n nuwe taal aan te leer. Ek is tans besig om Spaans te leer omdat ek nou meer tyd tot my beskikking het gedurende lockdown. Die app is ongelooflik, daar is soveel verskillende tale om van te kies – selfs inheemse tale van Hawaii wat besig is om uit te sterf.

“Ek het my joga-opleidingskursus voltooi en bied graag jogaklasse aan, maar aangesien ek nie op die oomblik joga­klasse in persoon kan aanbied nie, gebruik ek die conference call app Zoom daarvoor. Soos wat mense dit vir vergaderings gebruik, so gebruik ek dit om aanlyn jogaklasse aan te bied waar almal wat die klas bywoon dan van hulle huis af inskakel.

“Ek hou ook nogal van TikTok, dis lekker om jou niche te vind en dan kreatiewe videos te maak.

“En Houseparty is lek­ker om met jou vriende op te vang en ‘bordspe­letjies’ te speel gedurende hierdie tyd.”


Wilné van Rooyen (21), honneursstudent in joer­nalistiek aan die Universiteit Stellenbosch

“My go-to app is Spotify, ’n app waarop ’n mens musiek en podcasts kan luister. Ek is mal oor mu­siek en gebruik hierdie app omtrent 24/7. Wanneer ek ’n studiebreuk neem, gaan ek dadelik op Spotify en snuffel vir liedjies of groepe wat ek nog nie ken nie, ek noem dit sommer ‘navorsing’. Spotify gooi jou musiek saam in playlists volgens die tipe musiek wat jy gewoonlik na luister, so op dié manier ontdek jy nog meer musiek wat jy dalk nie ken nie. Ek weet nie hoe ek lockdown sou oorleef sonder Spotify nie. As dit nie daarvoor was nie sou ek lankal my kop verloor het!

“Ek het ook Pinterest onlangs meer begin gebruik. Partykeer is daar regtig inspirerende aanhalings daarop waarvan ek hou en dit sit my sommer in ’n goeie bui vir die dag. Dit is vir my ont­span­nend om die app te gebruik en lekker om die prentjies waarvan jy hou in kategorieë te groepeer en om later dan weer deur alles te kyk. Ek gebruik Pinterest ook wanneer ek teken, want ek soek inspirasie en idees daarop.

“Ek gebruik ook ­Tumblr, wat soortgelyk is aan Pinterest, om inspirasie en idees te versamel vir projekte wat ek wil aanpak.”


Nienke Osborne (24), mees­terstudent in ge­skie­denis aan die Universiteit Stellenbosch

“Ek het die app Tasty afgelaai en is versot daarop. Dit is basies ’n app wat vir jou leer kosmaak van scratch af, so dis perfek vir iemand soos ek wat absoluut niks weet van kosmaak nie. Hulle neem jou stap-vir-stap deur alles, gee vir jou die inko­pielysie, en daar is selfs video’s van hoe om die disse te maak. Dit maak die lewe baie maklik.”

“Dan het ek ook Mr Delivery en Uber Eats gebruik vir daai dae wat ’n mens net lus is vir wegneemetes – soms is ’n mens net doodeenvoudig té lus vir daai pizza, bur­ger of sushi!”

“Wattpad is ook ’n lek­ker app waarop ek afgekom het. Dit is ’n app waarop aspirant-skry­wers stories publiseer en ’n mens dit dan kan lees. Ek is mal oor lees, so hier­die app is beslis een van my gunstelinge. Dit is ook ’n goeie platform vir skrywers om hulle werk onder die oë van uit­ge­wers te kry en sodoende die kans te kry om hulle werk gepubliseer te kry.

“En dan die dating app Tinder! Want dit is da­rem een manier om nuwe mense te ‘ontmoet’ gedu­rende lockdown! Dis nog­al entertaining, party men­se stuur terrible pick-up lines en ’n mens kan daarom nie anders as om te lag nie. Jy hoef ook nie noodwendig die app te gebruik vir ‘dating’ doeleindes nie, dis net ’n lekker manier om mense te ontmoet. Jy kan dit duidelik maak op jou profiel dat jy slegs geïnte­resseerd is daarin om nu­we mense te ontmoet en nie noodwendig ’n pasmaat nie. Dis regtig pret en sorg vir baie vermaak.”