Suid-Afrika is uit die derde en langste vlaag van Covid-infeksies tot nog toe en daarom het die kabinet aanbeveel die land skuif terug na Vlak 1 van die staat van inperking vanaf middernag op Vrydag 1 Oktober, het president Cyril Ramaphosa die vorige aand in ’n direkte uitsending aangekondig.

Die nuwe Vlak 1-maatreëls, wat reeds in die Staatskoerant gepubliseer is, lê minder beperkings op sosiale byeenkomste as dié wat met die vorige Vlak 1 gegeld het vanaf 1 Maart tot 14 Junie vanjaar. Politieke ontleders se aanname is dit is om voorsiening te maak vir verkiesingsveldtogte in die aanloop tot die plaaslike verkiesings op 1 November.

Wat beteken die nuwe Vlak 1-maatreëls vir kerke?

• Maksimum 750 mense by eredienste toegelaat

Vanaf 100 in Vlak 2 mag ’n maksimum van 750 mense nou binnenshuise byeenkomste bywoon mits dit nie meer as 50% van die vertrek se kapasiteit oorskry nie. Die maksimum vir buitemuurse byeenkomste is verhoog na 2 000. Die vergunnings is onderhewig aan die nougesette nakom van gesondheidsprotokols en sosiale afstand.

Die sameroeper van die byeenkoms bly aanspreeklik om toe te sien dat die voorgeskrewe Covid-maatreëls nagekom word. Sowel die organiseerder en deelnemers van byeenkomste kan krimineel aangekla word indien daar meer mense is as wat toelaatbaar is in terme van die nuwe Vlak 1-maatreëls.

• Nagwake bly verbode

Die toelaatbare getal roubeklaers vermeerder vanaf 50 tot 100. Nagwake voor en byeenkomste ná begrafnisse bly steeds verbode.

Inentingsveldtog mik vir 70% teen Desember

Die president het burgers aangemoedig om hulle te laat inent teen Covid-19. Die mikpunt is om 70% van die volwasse bevolking teen Desember ingeënt te hê ten einde die uitbreek van ’n vierde vlaag van infeksies te probeer voorkom.