Interaktiewe gesprekgidse vir jong gelowiges

GOM vir jou stukkende wêreld – 5 waarhede om aan te kleef deur Jan Vermeulen

Gom

Uitgewer: Luca, 2021

Resensent: Rethie van Niekerk

Gom vir jou stukkende wêreld is ’n heerlike, interaktiewe boek vir tieners. Eenvoudig geskryf en kreatief uitgelê, met kort, verteerbare stukkies inligting is dit ’n boek wat tieners maklik sal lees – en geniet!

Vermeulen som die kernboodskap van die Bybel in vyf waarhede op: Ek kan die Bybel vertrou; God is liefde; Ek verdwaal soms; God kom soek en red my volkome; en Nou wil ek graag dankie sê.

Op toeganklike en relevante manier kyk hy na sake soos die gesag van die Bybel, swaarkry, natuurrampe, Satan, ensovoorts. Ek sal graag hierdie boek vir alle tieners – en baie grootmense! – persent gee.

Beskikbaar by Lapa.

  • Ds Rethie van Niekerk is ’n predikant by Blouwaterbaai Familiekerk in Gqeberha.

Ja vir Jesus! Wat nou? deur Ina Fourie

JavirJesus1

Uitgewer: Naledi, 2020

Resensent: Eldré Bester

Ina Fourie het vir baie jare persone wat in die okkulte vasgevang was, gehelp. Uit hierdie agtergrond skryf sy vir jong gelowiges wat onlangs die geloofspad betree het.

Die skrywer se warmte en opregtheid is opvallend. Die boek fokus op jong gelowiges se nuwe identiteit in Christus en die betekenis van wedergeboorte. Fourie wil jongmense tot geestelike groei en geloofsvolwassenheid begelei.

Alhoewel die dagstukke in maklik verstaanbare taal geskryf is, kan dit as lank en “prekerig” beleef word. Die voorkoms en styl van die boek is ook nie noodwendig tienervriendelik nie.

Beskikbaar by Naledi.

  • Ds Eldré Bester is ’n predikant by Algoa Gemeenskapskerk in Gqeberha.
Word 'n vriend van Kerkbode