Jacobus Pieter Marais Stapelberg  is op 11 September 1931 gebore op  Despatch, ’n nywerheidsdorp naby  Port Elizabeth. Sy vader is Frans Johannes Jacobus Stapelberg, ’n werker  by die Suid-Afrikaanse Spoorweë en  Hawens. Sy moeder is Wilhelmina  Christina Elizabeth van der Walt. In  1961 word die egpaar koshuisouers aan die Hoërskool Trompsburg, waar hulle  met liefde uitreik na boere se kinders  wat in die week in die koshuis is en net  naweke huis toe gaan. Gerdrie was toe  ’n plaasseun in Sub A, wat die eerste  keer uit die huis gegaan het en die  opregte omgee van die twee dierbare  koshuisouers beleef het.

Kobus begin sy skoolopleiding in  1941 en weens sy vader se werk, is hy  leerling aan die Laerskole Despatch,  Cradock en Port Elizabeth. Hy is later leerling aan die Hoërskool Brandwag op  Uitenhage, waar hy in 1948 matrikuleer.  Kobus is in sy skooljare hoofspanleier  van die Voortrekkers op Despatch en verwerf ook erekleure in rugby. Hy  voel geroepe om vir die Here te werk,  maar werk na matriek ’n jaar lank by ’n  motorfabriek in Port Elizabeth.

Hy vertrek in 1950 na Stellenbosch waar hy die BA-graad in 1952 verwerf  en na die sendingveld in Masjonaland  vertrek waar hy vyf jaar lank as sendingonderwyser die Here dien. Op Stellenbosch speel hy ’n rol in die Voortrekkers  se staatmakergroep as offisier en is deel  van die Studentevrywilligerbeweging.

Kobus voel geroepe om predikant te  word en sy pad loop terug na Stellenbosch waar hy na die aflegging van die  admissie-eksamen in 1958 die bekende marmertrappies van die Kweekskool  klim en hy word aan die einde van 1962  as proponent gelegitimeer. Hy tree op  4 Januarie 1958 in die huwelik met Martha Magdalena Kellerman en  uit die huwelik is vier kinders gebore,  waarvan een jonk sterf. Later gee hulle  op 13 November 2007 nog ’n seun ds Frans  Stapelberg (46) weens ’n longkwaal  aan die dood af.

Op 9 Maart 1963 word prop JPM Stapelberg met handoplegging in die NG  Gemeente Grootrivier op die walle van  die Oranjerivier ontvang en bevestig.  Hier beleef hulle ’n ware leerskool van  die lewe met interessante karakters wat  hulle lewe help vorm. In sy hart bly ds  Kobus ’n sendeling, daarom loop sy pad  in 1967 na die NGKA te Potgietersrus Oos. Hier is hy sendeling by die NG  Kerk se Groothoek-sendingstasie in die  mooi omgewing van Pietpotgietersrus,  waar hy voorsitter is van die NGKA se  Ring van Burgersfort. Hulle kinders  gaan in Zebediela skool tot ds Kobus  Stapelberg in 1974 ’n beroep aanvaar  as sendeling in die NGKA te Irene in  Pretoria. Hier beleef hy vele uitdagings  in die swart stedelike gebied en soek  biddend antwoorde vir die krisisse  wat hy daagliks moet hanteer. Die  feit dat hy kort tevore ’n MA-graad  in Volkekunde behaal het, gee hom  die broodnodige kennis om met die  nodige begrip situasies te hanteer. Die  tema van sy tesis is: “Farm labour on  the Zebediela Estates”.

’n Skerp draai kom op ds Kobus  Stapelberg se pad, toe hy ’n beroep  ontvang na die NG Gemeente Molteno, ’n dorp geleë in die Stormberge  in Oos-Kaapland. Hier word hy op  16 Julie 1977 ontvang en bevestig in die pragtige rooibaksteen-kerkgebou  in die hart van die dorp van drome,  soos die kunstenaar en skrywer Johannes Meintjies, sy grootworddorp  beskryf. Hier beleef die leraarspaar  wonderlike tye saam met die lieflike  boeregemeenskap, waar hy en sy vrou  saam met die gemeenskap leef. Een van die hoogtepunte is die herlewing  wat in 1986 tydens Pinkstertyd uitbreek  onder hoërskoolleerlinge in Molteno. ’n  Hoogtepunt is ook die oprigting van ’n  woonstelkompleks vir bejaardes op die  dorp, ’n projek waarin die NG Kerk op  Molteno ’n groot rol speel.

Na ’n lang dienstydperk as leraar op  Molteno, aanvaar ds JPM Stapelberg sy  emeritaat op 25 Augustus 1991 weens  verswakte gesondheid. Die egpaar bly  in Molteno woon, maar verhuis in 1993  na Kaap St Francis aan die prentjiemooi kuslyn. Intussen hou ds Kobus hom  besig met dinge waarvan hy hou, soos  ’n byeboerdery en familienavorsing  oor die Stapelbergs. Hierdie getroue  dienskneg van die Here sterf op 21  Oktober 2020 en sy naby familie en  vriende neem tydens ’n intieme diens  van hom afskeid. – Dr Gerdrie van der  Merwe VDM.