’n Fikse lidmaat van die Familiekerk NG Kameeldrif in die noordooste van Pretoria het ’n uitmergelende veldwedloop in die Witteberge in die Oos-Kaap ten bate van ’n spesiale gemeentefonds voltooi.

Om so naby aan die skepping te beweeg, was deel van Francois Liebenberg (45) se motivering vir die buitengewone fondsinsamelingprojek, verduidelik hy ná vanjaar se K-Way SkyRun, wat einde November plaasgevind het.

Francois het vir die gemeente se bedieningsfonds gehardloop, volgens dr Roelf Opperman, die gemeenteleraar. “Ons steek ons hande uit na die gemeenskap om ons,” verduidelik hy.

’n Liefde vir die buitelewe is in die DNS van al die Liebenbergs. Hy, sy vrou Maxie, en hulle twee tieners, Gustav en Latika, stap, kamp en roei gereeld. September het Maxie saam met hom ’n 50 km-wedloop in die Drakensberge gedoen.

Dit is nie die eerste keer wat Francois sy kuite inspan om geld in te samel nie. Hy het ook so twee jaar terug op hierdie manier vir ’n skool fondse ingesamel.

Terwyl baie SkyRun-deelnemers nie die eindstreep haal nie, het Francois 40ste klaargemaak uit die 102 wat hierdie een (19-20 November) kon deursien.

Daar word net 200 deelnemers toegelaat.

Die gehardloop het vir hom ’n geestelike komponent: “Ek glo God het die tyd vir ons op aarde gegee om absoluut die meeste daaruit te kry, die meeste ondervindinge te kan beleef, jouself te ‘push’ tot daar waar jy nie meer kan nie. As jy verveeld raak is daar fout, daar is net te veel voorregte en geleenthede, moenie jouself parkeer in die garage want dit is veilig en maklik nie, gaan uit vir die ‘joyride’ en gebruik jou tyd ten volle,” vertel Francois.