“Dit is vir my asof die kerk op soveel maniere weer besig is om werklik kerk te word,” vertel Dana Snyman ná ’n omvattende verkenningsreis deur die land vir ’n nuwe televisiereeks wat Sondag 3 September om 20:00 op kykNET (DStv-kanaal 144) begin draai. 

“Lidmaatgetalle daal dalk, maar gemeentes is op soveel plekke wat ek besoek het, steeds intens betrokke by mense en probeer om gemeenskappe se gebrokenheid weer heel te maak,” sê Dana oor dié storieprojek wat kykNET as ’n “verkenningsreis met godsdiens, geloof en die Afrikaanse susterskerke” bestempel.

In Grondpad geloof besoek Dana, gewilde skrywer asook Kerkbode-medewerker, plekke soos Ventersdorp, Merweville, Philippolis en Stellenbosch. Hy gesels met allerhande mense om sy eie vrae oor geloof te takel.

LEES OOK: Dana se Kerkbode-rubrieke 

“Dit was vir my nogal ’n emosionele ervaring om vir byna ’n maand deur die land te reis, van kerk na kerk, en met mense oor geloof en die kerk te praat,” sê Dana oor die reeks, wat begin in Mookgophong in Limpopo by die NG Kerk waar sy pa jare gelede ’n dominee was.

Dana glo kykers gaan deur dié reis te volg genadiger wees teenoor diegene wat anders as hulle oor geloofsake dink en dat hierdie reeks veral oor hoop gaan, luidens ’n verklaring wat vandeesweek uitgereik is. 

As storieverteller het Dana die reeks aangepak oor dit vir hom nóg ’n manier was om ’n boeiende verhaal te vertel. “Baie van my stories gaan oor reise, en ek het gedink: Hoekom nie ’n geloofsreis nie? Ek het sestig geword. Geloof is vir my belangriker as ooit in my lewe.”

• Bron: Persverklaring uitgereik deur kykNET
• Het jy nuus? Kontak ons gerus per Whatsapp by 072 149 1969 of e-pos: kerkbode@tydskrifte.co.za.
• Hierdie artikel is ’n mediavrystelling of storie wat aan Kerkbode gestuur is. Dit is geredigeer vir lengte, maar basies gepubliseer soos dit ontvang is.