Prof Johan Janse van Rensburg van Bloemfontein skryf:

Ek luister na ’n televisie-opname van ’n voordrag tydens die teologiese dag van die Fakulteit Teologie (UV) in 2022. Een van die voordragte het gehandel oor ’n kwesbare houding teenoor die LGBTQ-beweging.

Wat ontnugter en skok is die wyse waarop die Heilige Skrif gebruik word om die LGBTQ-beweging Skriftuurlik te regverdig. Ons ken almal die uitdrukking in die rekenaarwetenskap: “Cut and paste”. Josef word voorgehou as ’n “queer”-figuur omdat sy vader vir hom ’n veelkleurige jas gemaak het. Dié kleed word in verband gebring met ’n mantel wat dogters van die koning gedra het as hulle nog maagde was (2 Sam 13:18). Dat Josef “queer” was, word verder afgelei uit die feit dat sy broers in hom ’n afsku gehad het, soos dit ook vandag met die LGBTQ-beweging gebeur. Josef was sodoende ’n kwesbare (“vulnerable”) figuur wat as toonbeeld van die LGBTQ-beweging voorgehou word.

Alles wat in die hermeneutiek geskryf staan, skreeu teen só ’n knip-en-plak-gebruik van die Skrif. Die maagdekleed word sonder meer gekopieer en op die kleed wat Josef gedra het, oorgeplaas. Dit kan tog nie!

Josef was die eersgebore seun van Ragel, Jakob se tweede vrou. Josef het die eersgeboortereg gehad en het die veelkleurige kleed as geskenk ontvang (Gen 37:3). Boonop verwys 2 Samuel 13:18 na ’n monargiale tyd terwyl vader Jakob en Josef in ’n voor-monargiale tyd gelewe het.

Om die Bybel op so ’n manier in ’n “gay”-keurslyf in te forseer, gaan nie help om die groterwordende wig in die kerk te oorbrug nie. As die Bybel die hoogste norm is en die boodskap en bedoeling van die teks word doelbewus verdraai, gaan ons mekaar nie vind nie. Eenheid in die kerk is net in die waarheid van die Woord moontlik.