Gereed om te dien | Twee gelegitimeer op Wellington

Dr Jana van den Munckhoff het op 24 Junie vir Le-Anke Coetzer gelegitimeer as NG predikant en Belinda Bothma as diensleraar tydens ’n aandkapeldiens by die Andrew Murray Sentrum vir Spiritualiteit op Wellington.

Le-Anke Antoinette Coetzer (de Lange) is gebore op 25 Januarie 1994 op Cradock. Vanaf 2003-2012 was sy woonagtig in Port Elizabeth en het by die Hoërskool Framesby in 2012 gematrikuleer. Daarna het sy voltyds BDiv by die Universiteit Stellenbosch gestudeer. Haar tesis was in pastoraat en die aanvaarding van kinders wat volgens die samelewing anders is. Haar MDiv-tesis onder leiding van prof Anita Cloete het gehandel oor die betrokkenheid van jongmense in die NG Kerk en waarom jongmense nie meer die kerk as ’n veilige plek sien nie. Haar gemeentejaar het sy in 2018 gedoen by NG Kerk Stellenbosch-Sentraal onder leiding van dii Dolf en Ankia du Plooӱ. Sy het die wêreld se liefde en respek vir beide hierdie mense.

In 2019 het sy ’n beroep as jeugwerker op Lichtenburg aanvaar wat beteken het sy was ver van haar huis en mense toe die Covid-pandemie in 2020 tref. In 2022 het die plaaslike hoërskool op Lichtenburg haar genader om as berader en onderwyser te werk by hulle. Daar was sy veral betrokke by die geestelike en emosionele welstand van die leerders.

Sy is in 2022 getroud met Stefan Coetzer, ’n joernalis van Alberton. Hy het Lichtenburg toe verhuis en saam het hulle besluit om aansoek te doen vir die pos as jeugwerker/diensleraar by die plaaslike gemeente op Ballito. In September 2023 het hulle na Ballito getrek waar hulle die laaste nege maande tuis is. Vir haar is die kerk ’n plek waar sy voel sy haar roeping kan uitleef en God se hande en voete is. Sy geniet dit veral om met die jeug te werk asook berading onder jeug te doen. Kontak haar by 073 409 5994 of leankecoetzer@gmail.com.

Belinda Bothma is gebore op 25 Desember 1973 in Springs en het opgegroei in Brakpan en Worcester, het ’n lewe gelei wat daaraan toegewy is om ander te dien, veral kinders. Nadat sy haar skoolopleiding op Worcester voltooi het, het sy haar reis met ’n regs- en rekenaar sekretariële kursus in 1992 aangepak, saam met talle ander kursusse in rekeningkunde en rekenaarvaardighede.’n Transformerende oomblik het in 2005 gekom tydens ’n Kinder EEIII-kursus, wat haar na ’n pad gelei het om God te dien deur met kinders te werk. Dit het haar gelei tot verdere kwalifikasies deur CEF in Strand (2009), ’n Unisa Kindersorgkursus (2010), en ’n Nagraadse Sertifikaat in Funksionele Terapie van Perspektief Opleiding Kollege.

Gedryf deur die diepgaande behoeftes wat sy onder kinders waargeneem het, was Belinda medestigter van Hope Explosion Youth Ministries (H.E.Y!) om voltydse ondersteuning te bied in skole op verskeie dorpe, insluitend internasionale uitreike in Windhoek, Zambië en Rusland. In 2013 het sy deur NG Benoni-Benjamin as jeugwerker by Laerskool Brentwoodpark begin werk, wat haar passie aangevuur het om kinders in nood by te staan. Hierdie passie het uitgebrei na breër gemeenskapsdiens, wat haar aangespoor het om verdere opleiding in Hulp Maatskaplike Werk en Spelterapie in 2014 en 2015 te volg.

Die impak van die COVID-19-pandemie het haar toewyding om haar gemeente en gemeenskap te help verdiep, wat haar gelei het om as bedienaar te studeer en later ’n BTh-graad in 2021 om ’n diensleraar te word. Belinda, getroud met Dirk Bothma met ’n seun Werner, bly toegewyd aan haar roeping in kinders, familie, gemeenskapswerk en berading. Sy is beroepbaar en kan gekontak word op 073 835 5084 of belinda@hey.org.za.