Samewerking tussen verskillende kerke is ’n geskenk vir die Suid-Afrikaanse nasie, het eerw Mzwandile Molo, algemene sekretaris van die SA Raad van Kerke (SARK), Woensdagoggend gesê op die tweede dag van die vergadering van die Algemene Sinode Moderamen (ASM) wat op 29-31 Oktober in Benoni luister na terugvoer van taakspanne en besin oor die NG Kerk se roeping.

“It is a beautiful moment to reflect on what is our common witness in this country.” Ontvang (die boodskap) as ’n uitnodiging, het Molo die sowat 40 afgevaardigdes van al tien streeksinodes van die NG Kerk tydens sy gasrede versoek. Eenheid is nie ’n strategie nie, het hy verduidelik. Ons soek eenheid, want daar is ’n wanvoorstelling van wie God is, as ons nie saam is nie. Molo, ’n Metodis, het gesê Suid-Afrikaners het tot ’n mate die beeld verloor van hoe ons sáám lyk. Die mag om Suid-Afrika te verander lê nie in hoofkantore nie, dit is in die gewone gemeentes, aldus Molo. “Dis waar ons mense leef en waar ons ekumene moet vind in gedeelde aksie.”

Molo het aangehaal uit Johannes 17:21-22 en Galasiërs 3:28-29 om eenheid tussen Christengelowiges teologies te begrond.

Oor die visie van die SARK, het Molo stilgestaan by “ingrypings” waarvoor hierdie ekumeniese liggaam hom beywer:

• Genesing en versoening
• Ekonomiese transformasie
• Om demokrasie te anker
• Omvattende gehalte-onderwys
• Ekologiese geregtigheid

Molo het die NG Kerk uitgenooi om saam te werk hieraan.

Nog gaste by die ASM-vergadering was twee onafhanklike joernaliste wat genooi is om ’n soort binneperspektief te gee oor hoe die NG Kerk se beeld in die nuusmedia in praktyk gevorm word. Jana Marx en Carla Lewis, wat ook betrokke is by leergeleenthede vir NG predikante rondom mediageletterdheid, het in ’n wydlopende bydrae lig gewerp op onder meer die oorwegingsprosesse vir die belangrike vraag: Wat is nuus? en aan ’n tafelgespreksessie deelgeneem. – Hou Kerkbode dop vir meer beriggewing.